Bəxtiyar Hacıyev 14 gündür aclıq edir 

Bakı/28.12.22/Turan: Həbsdə olan ictimai fəal Bəxtiyar Hacıyev 14 gündür aclığı davam etdirir.

Dekabrın 28-də vəkillər  Şəhla Hümbətova, Zibeydə Sadıqova və Aqil Layıc 1 saylı Bakı İstintaq Təcridxanasında Bəxtiyar Hacıyevlə görüşüb. Görüş 3 saatdan çox davam edib.

Vəkil Şəhla Hümbətova Amerikanın Səsinə deyib ki, Bəxtiyar Hacıyev aclığı davam etdirir və sonadək aclığı davam etdirməkdə israrlıdır.

“O Penitensiar Xidmətin həkiminin nəzarətindədir. Sağlamlıq durum zəifdir. Yəni 14 gün aclıq edən insanın səhhəti necədirsə, onun səhhəti də elədir. O dedi ki, dünən bədəninə sistem köçürülüb və ondan sonra nisbətən yaxşı olub. Amma, bu gün sistemin verdiyi gümrahlıq keçib, yenə də müvazinətini itirir.”

Vəkil deyib ki, dekabrın 29-da saat 16.30-da Xətai rayon Məhkəməsində Bəxtiyar Hacıyev barəsində seçilmiş həbs qətimkan tədbirnin ev dustaqlığı tədbiri ilə əvəz edilməsi barədə vəkillərin növbəti vəsatətinə baxılacaq.

“Bu vəkillərin həbs qətimkan tədbirinin dəyişdirilməsi ilə bağlı ikinci vəsatətidir. Birinci vəsatətə dekabrın 20-də baxılıb və təmin edilməyib. Ondan sonra Bəxtiyar artıq 8 gündür aclığı davam etdirir. O kifayət qədər zəifləyib, immuniteti aşağı düşüb. Hazırda ölkədə koranavirus infeksiyasına yoluxma artmadadır, Bəxtiyar isə ummuniteti zəif halda qapalı yerdə saxlanılır. Onun infeksiyaya və ya başqa xəstəliyə yoluxma riski nəzərə alınmaldır. Bununla yanaşı növbəti 6 gün bayram günləridir və onunla vəkillərin görüşü olmayacaq. Həmçinin isitintaq orqanı Bəxtiyarın ailəsi ilə telefon danışığına qadağa qoyub. Bu səbəbdən növbəti günlərdə onun səhhəti ilə bağlı hər hansı məlumat almaq mümkün olmayacaq. O özü də dedi ki, ona qarşı təxribat da ola bilər. Bu səbəblərdən o ev şəraitində olsa daha yaxşı olar”, vəkil qeyd edib.

Öz növbəsində, Penitensiar Xidmətin İctmiayyətlə əlaqələr şöbəsindən Amerikanın Səsinə bildiriblər ki, Hacıyev həkim nəzarəti altındadır, səhhəti normaldır.

Dekabrın 9-da Bakının Xətai rayon Məhkəməsi hakim Fuad Axundovun sədrliyi ilə ictimai fəal Bəxtiyar Hacıyev barəsində 1 ay 20 gün həbs qətimkan tədbiri seçib.

Bəxtiyar Hacıyev barəsində Cinayət Məcəlləsinin 221-ci (Xuliqanlıq) və 289-cu (Məhkəməyə hörmətsizlik etmə) maddələri ilə cinayət işi açılıb.

Hacıyev məhkəmədəki çıxışında irəli sürülən ittihamları qəbul etməyib, siyasi fəaliyyətinə, o cümlədən beynəlxalq forumlarda hakimiyyəti tənqid etdiyinə görə təqib olunduğunu bildirib. Belə ki, Hacıyevin həbsi dekabrın 7-də Avropa İttifaqının Şərq Tərəfdaşlığı Vətəndaş Cəmiyyəti Formunun Praqada keçirilən illik Assambleyasında iştirakdan sonraya təsadüf edir.

Dekabrın 15-də Bakı Apellyasiya Məhkəməsi hakim Zəki Babayevin sədrliyi ilə Bəxtiyar Hacıyevin həbsindən verilmiş apellyasiya şikayətini təmin etməyib.

Məhkəmədə Bəxtiyar Hacıyev etiraz olaraq müddətsiz aclıq aksiyasına başladığını elan edib və 14 gündür aksiyanı davam etdirir.

Dekabrın 20-də Xətai rayon Məhkəməsi ictimai fəalın barəsində seçilmiş həbs qətimkan tədbirnin ev dustaqlığı imkan tədbiri ilə əvəz edilməsi barədə müraciətini təmin etməyib. Dekabrın 23-də Bakı Appelyasia Məhkəməsi də bu məhkəmə qərarından verilən şikayəti təmin etməyib.

Çoxsaylı yerli və beynəlxalq təşkilatlar Bəxtiyar Hacıyevin həbsinə görə Azərbaycan siyasi hakimiyyətini qınayan bəyanatlarla çıxış edib.

Rəsmi Bakı Bəxtiyar Hacıyevin həbsi ilə bağlı yerli və beynəlxalq reaksiyalara hələ münasibət bildirməyib. Bununla yanaşı, Azərbaycan hakimiyyəti bir qayda olaraq belə bəyanatları qəbul etmir və qərəzli hesab edir.

ABŞ Dövlət Departamenti hüquq müdafiəçisi və hökumətin tənqidçisi Bəxtiyar Hacıyevin həbs edilməsinə reaksiya verib.

“Biz İnsan Hüquqları Günü ərəfəsində cənab Hacıyevin saxlanılmasından və həbs edilməsindən dərindən narahatıq və hakimiyyəti onu dərhal azad etməyə çağırırıq”, Departamentin mətbuat katibinin müavini Vedant Patel qeyd edib.-0305-