Bloger Mehman Hüseynov ölümün yaxınlığında

Vəkil Şəhla Hüseynova bildirib ki, 14 saylı koloniyada quru aclıq edən bloger Mehman Hüseynovun vəziyyəti kritikdir. O, həmkarı Fuad Ağayevlə birlikdə dekabrın 28-də koloniyada M.Hüseynovla görüşüblər.

Mehman ikinci cinayət ittihamının qarşısının alınması üçün aclıq edir və birinci cəza müddətinin başa çatma ərəfəsində məhkəmə onun əleyhinə çıxıb. Dekabrın 26-da koloniyada blogerə qarşı istintaq başlayıb. Ona CM-in 317.2-ci maddəsi (cəzaçəkmə müəssisəsi və ya təcridxananın normal fəaliyyətinin pozulması) ittiham irəli sürülüb.

M.Hüseynov koloniyanın əməkdaşı Əli Abdalova həyat və sağlamlığına təhlükə yaratmayan güc tətbiq etməkdə ittiham olunur. Bu maddə üzrə M.Hüseynovu 5 ildən 7 ilədək həbs gözləyir. Həmin gün M.Hüseynovu karserə salıblar və o, əsassız ittihama etiraz olaraq aclığa başlayıb. Birinci müddətlə bağlı azadlığa çıxmasına 2 ay qalırdı.

Rəsmi məlumata əsasən, dekabrın 26-da 14 saylı koloniyada məhbus Mehman Hüseynovda yarım min manata yaxın məbləğdə nağd pul aşkar edilib, münaqişə yaranıb və məhkum zabiti döyüb. Birinci həbs müddətini polisə böhtan atdığına görə almışdı. Mehman bildirmişdi ki, polisdə onu döyüblər, polis onu məhkəməyə vermişdi və blogeri iki il həbs etmişdilər.

"Mehman nə yemək yeyir, nə su içir, ittihamları rədd edir. O deyib ki, koloniya əməkdaşı özü yerə yıxılıb və qışqırıb ki, "bu məni vurdu", - vəkil deyib. "Mehmanı bizimlə görüşə gətirdilər, hər iki tərəfdən qollarından tutmuşdular. Sərbəst yeriyə bilmirdi, çox zəif idi, dedi ki, əgər qanunsuz iş bağlanmasa ölənədək aclıq edəcək", - vəkil qeyd edib.

Ehtimal olunur ki, blogerə qarşı yeni ittiham anasını hakimiyyətin öldürməsiylə bağlı dediklərinin cəzası kimi irəli sürülüb. Guya Mehman bu sözləri 2018-ci ilin avqustunda onu qısa müddətə anasının dəfn mərasiminə buraxdıqları zaman deyib. Hüquq müdafiəçiləri əmindir ki, M.Hüseynov yüksək vəzifəli şəxslər arasında korrupsiyanın ifşasına, həmçinin hakimiyyəti tənqid etdiyinə görə təqib olunur.

Demokratik ictimaiyyət Mehmanın həyatına görə narahatdır. Koloniyada blogerin ölümünün qarşısını almaq üçün təcili addımların atılmasına çağırışlar edilir.

M.Hüseynov ombudsman Elmira Süleymanova, prezident İlham Əliyev və birinci vitse-prezident Mehriban Əliyevaya məktub yazıb. Məktublar vəkillərin iştirakı ilə 14 saylı koloniyanın administrasiyasına təqdim olunub.

Keçmiş siyasi məhbus, REAL Partiyasının sədri İlqar Məmmədov Tvitter vasitəsilə AŞPA-nın siyasi məhbuslar üzrə məruzəçisinə bu haqda bildirib və ondan təcili Bakıya gəlməyi xahiş edib. Ancaq o cavab verib ki, belə tezliklə Azərbaycana gələ bilməz. "Bu deməkdir ki, AŞPA-nın Azərbaycanda siyasi məhbuslarla bağlı qərarları 2020-ci ildən tez qəbul edilməyəcək", - İ. Məmmədov belə nəticəyə gəlib.

"Həbsxanadan çıxmasına iki ay qalmış insanı yenidən həbsdə saxlamaqdan ötrü yeni maddə açmaq üçün başqa səbəb tapa bilməyiblər. Bu, son dörd ayda ilk hadisə deyil. Ayıbdır. "Yarım min manatı koloniyaya gətirməyə icazə verən əməkdaş niyə cəzalandırılmır?", - hüquq müdafiəçisi Səidə Qocamanlı narahatlıq keçirib.

Hüquq müdafiəçisi Eldar Zeynalov baş verənlərin resmi versiyasının yalan olması barədə nəticəyə gəlir:

1. Zabitin fiziki hazırlığı sıfır vəziyyətində olub, əgər onu çox güclü olmayan fotoqraf, səhhətinə görə ordudan azad edilmiş gənc döyə bilirsə (koloniyada tibbi -sanitar hissə var, odur ki, təcili yardım həddinə ancaq ciddi xəsarət yetirməklə çatdırmaq olar).

2. Tərbiyəvi hazırlığın səviyyəsi sıfır: Oğlana bu yaxınlarda koloniyada məzuniyyət veriblər, deməli, vəziyyəti yaxşı olub. Nə baş verdi ki, belə qəddarlasdı? Üstəlik son 3 ayda məhbusları azad edilmək üçün hazırlamadırlar.

3. Madam ki koloniyaya yarım min manata yaxın pul keçiriblər, deməli, rejim işi sıfır vəziyyətindədir. Bunu işçilərdən kimin etdiyini aydınlaşdırmayıblarsa, ikiqat sıfır vəziyyətindədir. Əgər ümumi "şmon" keçirib "zon"da daha neçə min manatın dolaşdığını aydınlaşdırmayıblarsa, üçqat sıfır vəziyyətindədir.

4. Həbsxana dükançısına (laryokçu) ayrıca sual: orada alış-veriş necə ödənilir (əgər nağd deyilsə), məhbusların (o cümlədən Mehmanın) bankda qanunla nəzərdə tutulmuş şəxsi hesabları varmı, onlar öz hesablarının bank rekvizitlərini bilirmi, məhbuslar və onların ailələri bunlardan istifadə edirmi?

14 saylı koloniyanın məhbuslarının hesablarında nə qədər pul var? Nəzərə alsaq ki, ümumi rejimdə ayda 50 manatadək xərcləmək olar, laryok isə var gücü ilə işləyir, həmin hesablarda hər ay 45-50 min manat və ya ildə yarım milyon manata yaxın olmalıdır. Və həbsxananın bütün mühasibatlığı həmin pulların köçürülməsi ilə bağlı əməliyyatlarla məşğul olmalıdır. Əgər bu, belə deyilsə, koloniyada qanunsuz nağd pulların olmasına və Mehmandan götürülən məbləğin dənizdə bir damla olmasına sübut lazım deyil.

Administrasiyanın təsvir etdiyi şəkildə vəziyyət ən ciddi təşkilati nəticələr doğurmalıdır. Əks halda məhbusa əlavə cəza müddəti verilməsi versiyası təkzibedilməz görünəcək", - E.Zeynalov sosial şəbəkədə yazıb.

Penitensiar Xidmətin ictimaiyyətlə əlaqələr şöbəsinin rəhbəri Mehman Sadıqov "Amerikanın səsi"nə bildirib ki, aclıq edən məhbus bu barədə müəssisə (koloniya) rəhbərliyinə məlumat verməlidir. Bundan sonra etirazçı ayrıca bloka köçürülür va ona tibbi nəzarət və digər tədbirlər təyin edilir.

2018-ci il dekabrın 30-da bazar günü Mehmanın quru aclıq keçirməsinin dördüncü günü oldu. Həkimlər bildirirlər ki, quru aclıq zamanı üçüncü sutkadan sonra orqanizmdə geriyə dönməz proseslər başlayır.

Quru aclığın beşinci-yeddinci günündən sonra aclıq edəni xilas etmək çox çətindir. Quru aclıqda əsas təhlükə orqanizmin susuzlaşması (dehidratasiya), su itkisinin fizioloji normadan aşağı olmasıdır.

Orqanizmin bir neçə faiz susuzlaşması həyat fəaliyyətinin pozulmasına səbəb olur. Əgər insanın itirdiyi suyun miqdarı sutkada bədənin kütləsinin 10%-nə çatırsa, əmək qabiliyyətinin xeyli aşağı düşməsi başlayır, 25%-ə çatdıqda isə adətən ölümlə nəticələnir.

Orqanizm 1-5% maye itirdikdə kəskin susuzluq yaranır, insan özünü pis edir, hərəkət yavaşıyır, yuxusuzluq, dəri qızartısı, temperatur artır, ürəkbulanma, mədə pozğunluğu yaranır.

6-10% itkidə nəfəs darlığı, baş ağrısı, ayaqlarda və əllərdə ağrılar, tüpürcəyin olmaması, hərəkət etmək qabiliyyətinin itirilməsi və nitqin pozulması baş verir. 11-20%-də sayıqlama, əzələ spazmı, dilin şişməsi, zəif eşitmə və görmə, bədənin soyuması baş verir. Yemək və sudan uzun müddət imtina (1-2 sutkadan çox) insan sağlamlığına mənfi təsir göstərir. Bədənin kütləsinin kəskin azalmasına və metobolik proseslərin pozulmasına səbəb olan su itkisi həyat üçün təhlükəlidir. Sağlam insanı sudan məhrum etmək 7-10 gündən sonra, isti, quru şəraitdə isə 3-5 gündən sonra ölümə səbəb olur.

Prezident məhbusun vaxtından əvvəl həbsxanadan buraxılması barədə göstəriş verməklə, müstəntiq və prokurorluq isə blogerə qarşı cinayət işinə xitam verilməsi barədə qərar qəbul etməklə quru aclığı dayandıra və Mehmanın həyatını xilas edə bilər. Əgər bunu etməsələr və ya bloger aclığı dayandırmasa öləcək. Hələ başlamayan, amma yaxınlaşmaqda olan faciəyə görə məsuliyyət hakimiyyətin üzərinə düşür.