Hüquq müdafiəçisi Taleh Hasmamedov azad edilib(YENİLƏNİB)

Bakı / 30.12.18 / Turan: Hüquq müdafiəçisi Taleh Hasmamedov azad edilib.

Sərbəst buraxıldıqdan sonra Xasməmmədov Göyçaydakı evinə yöllanib, hüquq müdafiəçisi Oqtay Gülalıyev bildirib.

Sərbəst buraxılma şərtləri və səbəbləri barədə heç bir məlumat yoxdur.

* * *

2018 Dekabr 30 (Bazar) 18:44:30

Taleh Xasməmmədli həbs edilib

Bakı/29.12.18/Turan: Daxili İşlər Nazirliyi hüquq müdafiəçisi Taleh Xasməmmədovla bağlı məlumat yayıb. Məlumatda deyilir:

"Dekabrın 27-də əldə olunmuş məlumat əsasında keçirilmiş əməliyyat-axtarış tədbirləri nəticəsində Nəsimi rayonu, Mircəlal küçəsində yerləşən kafelərin birində Bakı şəhər sakini olan bir nəfəri barəsində rüsvayedici məlumatlar yayacağı ilə hədələyib ondan 1000 manat pul alarkən Göyçay şəhər sakini, əvvəllər məhkum olunmuş Taleh Xasməmmədov saxlanılmışdır.

Faktla əlaqədar Cinayət Məcəlləsinin 182-ci (hədə-qorxu ilə tələb etmə) maddəsi ilə cinayət işi başlanmışdır".​

Taleh Xasməmmədovun həyat yoldaşı sosial mediadakı açıqlamasında bu ittihamı rədd edib. O bildirib ki, yoldaşının saxlanması onun hüquq-müdafiə sahəsindəki fəaliyyəti və son vaxtlar bir neçə rəsmi şəxslərin fəaliyyətini tənqid etməsi ilə bağlıdır.

Taleh Xasməmmədovun ailə üzvləri isə onun şərləndiyini bildiriblər. Onun həyat yoldaşı Fatimə Mövsum "Turan" agentliyinə deyib ki, dekabrın 27-si saat 14:00-dan hüquq müdafiəçisinə zəng çatmayıb.

"Maşını həyətə qoydu, bir neçə dəqiqəyə gələcəyin deyib evdən çıxdı. Telefonuna zəng çatsa da, sonradan telefonu söndürdülər. O, başqalarının hüquqlarını müdafiə edirdi, necə ola bilər ki, cinayətdə ittiham olunsun".

Həyat yoldaşı DİN məlumat yaysa da indiyədək onlara T. Xasməmmədovla baglı hər hansı informasiya verilmədiyini, onun vəkillə təmin edilib-edilməməsindən xəbər ala bilmədiklərini söyləyib.

Siyasi Məhbusları Müdafiə Mərkəzinin (SMMM) əlaqələndiricisi Oqtay Gülalıyev ehtimal edir ki, baş verənlər T. Xasməmmədovun hüquq müdafiəçisi kimi fəaliyyəti ilə bağlı ola bilər:

O.Gülalıyev deyir ki, Göyçay rayonunda yaşayan T. Xasməmmədova 2018-ci ildə polislə münaqişə ilə bağlı yenidən cinayət işi də açılmışdı, o, tez-tez polis və prokurorluğa çağrılırdı:

"Xaricə çıxışına qadağa qoyulmuşdu, səhhətilə bağlı müalicə almaq üçün xaricə getməli idi, buna da imkan vermirdilər.".

T.Xasməmmədov bundan əvvəl iki dəfə həbs olunub. O, ilk dəfə 2011-ci ilin noyabrında həbs edilib. 2012-ci ilin aprelində Göyçay Rayon Məhkəməsi onu xuliqanlıqda və polisə müqavimətdə ittiham edərək 4 il azadlıqdan məhrum edib. Beynəlxalq təşkilatlar onu "vicdan məhbusu" sayıb. Prezident İ.Əliyevin 2012-ci il dekabrın 26-da imzaladığı əfv sərəncamı ilə azadlığa çıxıb.

T.Xasməmmədov ikinci dəfə 2015-ci il iyulun 22-də Göyçay Rayon Məhkəməsinin hökmü ilə 3 il azadlıqdan məhrum edilib. O, bu dəfə də xuliqanlıqda ittiham olunub. Hüquq müdafiəçisi ittihamları rədd edib və həbsinin fəaliyyəti ilə bağlı olduğunu deyib. 2016-cı ilin martında yenidən prezidentin əfv fərmanı ilə azadlığa çıxıb.

Azərbaycanın rəsmiləri isə insanların hüquq müdafiəçisi kimi fəaliyyətinə və tənqidi mövqeyinə görə, təqiblərə məruz qalması ilə bağlı deyilənləri isə qəbul etmirlər.-0-