Cəmil Həsənli Qurban bayramı münasibəti ilə xalqı təbrik edib

Demokratik Qüvvələrin Milli Şurasının prezidentliyə namizədi Cəmil Həsənli Qurban bayramı münasibəti ilə xalqı təbrik edib. Təbrikdə deyilir; “Əziz həmvətənlər, Sizləri islam dünyasının ən böyük bayramlarından olan Qurban bayramı münasibətilə ürəkdən təbrik edirəm.

Bu bayram Allahla bəndə arasında əhd, əhdinə vəfalı, sözünə dürüst olmaq bayramıdır. İbrahim peyğəmbər (ə.s.) oğlu olarsa Allah yolunda qurban gətirmək əhdilə üz-üzə qaldı. Övladını Mina dağında qurban kəsməyə, bıçağı oğlu İsmayıl peyğəmbər (ə.s)-ın boğazına çəkməyə qədər gətirdi. Əhdinə vəfalı, sözünə dürüst qaldığı üçün Allah-Təala İbrahim peyğəmbəri mükafatlandırdı. İsmayılın əvəzinə qurban kəsmək üçün iki qoç göndərdi. Əgər Allahla bəndə arasında olan əhddə bəndə sözünə, əməlinə sədaqət göstərsə əbəttə, mükafatını alar.

Qurban bayramının mahiyyəti Allaha verilən vəd övlad ölümünə belə başa gəlsə, yenə də ona  sadiq qalmaq fəlsəfəsidir. Üzü dönüklərin, əhdini dananların, sözünü tutmayanların, əməli saleh olmayanların, can qorxusu önündə vəddən imtina edənlərin, riyakarların Allah yanında mükafatı ola bilməz.

Arzu edirəm ki, xalqımız Allah yanında belə bir mükafatdan məhrum olmasın.

Allah-Təala kəsilən qurbanları qəbul, xalqımızı xeyirli olmayan niyyət və savablı olmayan əməllərdən hifz etsin.

Bir daha bayramınız mübarək!”