“Ceyşullah” dəstəsinin iştirakçısı saxlanılıb

Bakı/18.09.20/Turan: Dövlət Təhlükəsizliyi Xidmətinin xüsusi əməliyyatı zamanı 2016-2019-cu illər ərzində ölkə hüdudlarından kənarda terror aktlarının törədilməsi ilə müşaiyət olunan, dini məzhəbləri yaymaq adı altında, dini düşmənçilik zəminində aparılan silahlı münaqişələrdə iştirak etmək məqsədilə Suriya Ərəb Respublikasının Hələb şəhərinin Leroman qəsəbəsində xüsusi hazırlıq düşərgəsində təlimlər keçməkdə, müxtəlif odlu silah və partlayıcı qurğulardan istifadə qaydalarına yiyələnərək  “Ceyşullah” və digər qanunsuz silahlı dəstələrin tərkibində Hələb, Hama və İdlib şəhərlərində silahlı münaqişələrdə iştirak etməkdə şübhəli bilinən Azərbaycan vətəndaşı Amil Əhmədov həbs edilib. Bu barədə DTX-nin 18 sentyabr tarixli məlumatında deyilir.

Mənbənin məlumatına görə, sonradan Amil Əhmədov Suriyanı tərk edib və üçüncü ölkə ərazisinə keçib.

Onun saxlanılması üçün əməliyyat sentyabrın 7-də keçirilib. Ona qarşı Azərbaycan CM-in 283-1.3-cü (Azərbaycan Respublikasının hüdudlarından kənarda silahlı münaqişələrdə iştirak etmək məqsədilə sabit qruplar yaratmaq, həmin qruplarda, təlimlərdə və ya silahlı münaqişələrdə iştirak etmə) maddəsi ilə cinayət işi açılıb. -02D-