Daha bir həkim həbs edilib (YENİLƏNİB-VIDEO)

Əmək və Əhalinin Sosial Müdafiəsi Nazirliyi yanında Dövlət Tibbi-Sosial Ekspertiza və Reabilitasiya Agentliyinin 7 saylı Tibbi-Sosial Ekspert Komissiyasının sədri Oruc Məmmədov həbs edilib.

O, rüşvət almaqda ittiham edilir. Belə ki, Məmmədov vəzifə səlahiyyətlərindən istifadə edərək, vətəndaşdan Fövqəladə Hallar Nazirliyinin Zığda yerləşən koronavirus xəstələri üçün modul tipli xəstəxanasına yerləşdirilməsinə kömək etmək üçün 4 min manat alıb.

Məmmədova qarşı Cinayət Məcəlləsinin 311.2 (rüşvət alma) və 312-1.1-ci maddələri ilə ittiham irəli sürülüb, məhkəmənin qərarı ilə barəsində həbs qətimkan tədbiri seçilib.

Bu cinayətlərin törədilməsində bu və ya digər formada iştirak etmiş şəxslərin müəyyən edilməsi üzrə tədbirlər davam etdirilir. -0-

*   *   *

2021 Aprel 22 (Cümə axşamı) 13:58:58

“Yeni klinika”nın və Fövqəladə Hallar Nazirliyinin modul tipli xəstəxanasının rəhbərləri həbs edilib

Bakı/22.04.21/Turan: “Yeni klinika”nın direktoru Pərviz Abbasov rüşvət almaq ittihamı ilə həbs edilib, bu barədə Baş Prokurorluğun mətbuat xidməti məlumat yayıb.

Korrupsiyaya qarşı Mübarizə Baş İdarəsinin həyata keçirdiyi araşdırma zamanı Abbasovun və müəssisənin digər əməkdaşları – Əvəz Hüseynov, Samir Mirzəyev və Vüsalə Əliyevanın müəyyən ödəniş – 3000-3500 manat müqabilində koronavirus xəstələrini stasionar müalicə üçün klinikaya qəbul etdikləri müəyyən olunub.

Abbasov barəsində Cinayət Məcəlləsinin 311.3.1 (qabaqcadan əlbir olan bir qrup şəxs tərəfindən rüşvət alma) və 311.3.2-ci (təkrar rüşvət alma) maddələri ilə cinayət işi açılıb. Məhkəmənin qərarı ilə Abbasov həbs edilib.

Hüseynov, Əliyeva və Mirzəyev barəsində 32.5, 311.3.1-ci (qabaqcadan əlbir olan bir qrup şəxs tərəfindən rüşvət almada köməkçilik) maddə ilə cinayət işi açılıb.

Mirzəyev həbs edilib, Hüseynov və Əliyeva barələrində həbslə bağlı olmayan başqa qətimkan tədbiri seçilib.

“Yeni klinika” ötən ilin aprelində açılıb və burada koronavirus xəstələri müalicə olunurdu. Xəstəxana müasir tibbi avadanlıqlarla təchiz edilmişdi və “kovid” xəstələri arasında ən qabaqcıl xəstəxana hesab olunurdu.

Baş Prokurorluğun digər məlumatına görə, Fövqəladə Hallar Nazirliyi Tibbi Mərkəzinin Modul Tipli Hospitalının baş həkimi İmran Ağayev də eyni ittihamlarla həbs edilib.

O, tibb müəssisəsinin qeydiyyat şöbəsinin əməkdaşları Qulu Orucov və Taleh İmanlı ilə əlbir olaraq, koronavirus xəstələrinin qohumlarından xəstələrin rəhbəri olduğu tibb müəssisəsində yerləşdirilməsi, eləcə də, müalicə alan xəstələrin daha yüksək səviyyəli tibbi və sair təminatla təchiz edilmələri müqabilində rüşvət alıb.

Hər üçünə qarşı Cinayət Məcəlləsinin 311.3.1-ci (qabaqcadan əlbir olan bir qrup şəxs tərəfindən rüşvət alma) maddəsi ilə ittiham irəli sürülüb. -06D-