Daxili İşlər Nazirliyi toylarla bağlı vətəndaşlara xəbərdarlıq edib

Bakı/09.07.21/Turan: “Bu il iyulun 1-dən qapalı məkanlarda 150, açıq havada isə 50 nəfərin iştirakı ilə toy şənliklərinin keçirilməsinə icazə verilib. Lakin aparılan yoxlamalar nəticəsində müəyyən edilib ki, bəzi hallarda qeyd olunan qərardan irəli gələn tələblər pozulub...”, Daxili İşlər Nazirliyinin toylarla bağlı vətəndaşlara xəbərdarlığında belə deyilir.

Nazirlikdən daxil olan xəbərdarlığa görə, toylarda icazə verilən saydan artıq qonaq iştirak edir, eləcə də mərasimlərə qatılan şəxslərin əksəriyyətinin vaksinasiya olunmalarını təsdiq edən COVID-19 pasportu hələ də yoxdur.

Daxili İşlər Nazirliyi vətəndaşlardan təşkil edəcəkləri toy və digər şənlik mərasimləri zamanı koronovirus pandemiyası ilə əlaqədar tətbiq edilən bütün qərarlara, o cümlədən dəvət edilən qonaqların say məhdudiyyətinə nəzarət etməyi xahiş edir.

Xatırladaq ki, COVİD-19 pandemiyası ilə bağlı 2020-ci ilin martından bütün dünyada olduğu kimi, Azərbaycanda da kütləvi şənlik tərdbirlərinin keçirilməsinə məhdudiyyət tətbiq olunub. Bu il iyulun 1-dən isə müəyyən şərtlər daxilində toyların keçirilməsinə icazə verilib. -05D-