Demokratik.az saytının həbsdə olan rəhbəri aclıq aksiyasını dayandırıb

Bakı/04.08.23/Turan: Gəncə şəhər 2 saylı İstintaq Təcridxanasında saxlanılan "Demokratik.az" saytının redaktoru Osman Nərimanoğlu (Rzayev) keçirdiyi aclıq aksiyasını 12 gündən sonra, avqustun 4-də dayandırıb.

Bu barədə "Turan"a redaktorun həyat yoldaşı Arzu Rzayeva deyib.

“Bizim xahiş və təkidimizlə Osman bu gün aclıq aksiyasının 12-ci günündə aclığı dayandırdı. O, hüquqi müstəvidə mübarizəni davam etdirəcək. Təəssüf ki, 12 gün ərzində nə Ombudsman Aparatından, nə də Baş Prokurorluqdan onun tələbləri ilə bağlı heç kəs maraqlanmayıb", - Rzayeva deyib. 

Onun sözlərinə görə, aclıq nəticəsində Osmanın səhhəti pisləşib, halsızlıq, təzyiqin kəskin aşağı düşməsi, mədəsində ağrılar, baş gicəllənməsi yaradıb. 

O qeyd edib ki, avqustun 3-də Gəncə Ağır Cinayətlər Məhkəməsində keçirilən növbəti məhkəmə iclasında o ayaq üstə güclə dayanırdı. 

Məhkəmənin növbəti iclası hakimlərdən birinin məzuniyyətə çıxması səbəbindən sentyabrın 7-nə təyin edilib.

2022-ci il iyulun 5-dən həbsdə olan Osman Nərimanoğlu bəyan edib ki, Göygöl rayon məmurlarının ona qarşı başlatdığı qarayaxma kampaniyasının qurbanı olub. 

Ona qarşı Azərbaycan Cinayət Məcəlləsinin 182.2.2-ci (hədə-qorxu ilə tələb etmə) maddəsi ilə ittiham irəli sürülüb.

Ondan şikayət Göygöl xəstəxanasının direktoru Vasif Əliyev, rayon Suvarma Sistemləri İdarəsinin keçmiş rəisi İlqar Məhərrəmov və daha iki həkim tərəfindən verilib.