Dini fəal məhkəmədə işgəncələrdən danışıb

Bakı/24.05.23/Turan: Bu gün Bakı Apellyasiya Məhkəməsində "Müsəlman Birliyi" Hərəkatının fəalı Abbas Hüseynin şikayəti üzrə hazırlıq iclası keçirilib.

Şiikayət birinci instansiya məhkəməsinin Hüseynin cəza rejiminin sərtləşdirilməsi və onun Qobustan qapalı həbsxanasına köçürülməsi haqqında qərarından verilib.

Vəkil Fəxrəddin Mehdiyevin jurnalistlərə verdiyi məlumata görə, Hüseyn məhkəmədə bildirib ki, 7 saylı cəzaçəkmə müəssisəsində döyülmə və işgəncələrə məruz qalıb.

"Biz artıq bununla əlaqədar prokurorluğa şikayət vermişik. Araşdırma nəticələrindən asılı olaraq gələcək addımlar atacağıq. Prokurorluq cinayət işi açmaqdan imtina etsə bu qərardan məhkəməyə şikayət verəcəyik", deyə vəkil bildirib.

Öz növbəsində, fəalın bacısı Yasəmən Hüseynova bildirib ki, qardaşının üzündə və qollarında hələ də zorakılıq izləri var.

Mahiyyəti üzrə dinləmələr mayın 30-na təyin edilib.

* "Müsəlman Birliyi" Hərəkatının sədri Taleh Bağlrzadə, Abbas Hüseyn və bir neçə digər fəal 26 noyabr 2015-ci il tarixində DİN-in Nardaran qəsəbəsində xüsusi əməliyyatı nəticəsində saxlanılıb.

Saxlanılan şəxslər Bağırzadə tərəfindən təşkil edilmiş cinayətkar qrupda iştirak etməkdə ittiham olunublar. Məhkəmə onları terrorda, qanunsuz silah saxlamaqda, konstitusiya quruluşunu zorla dəyişdirmək cəhdində, polisə müqavimətdə və Cinayət Məcəlləsinin digər maddələrini pozmaqda təqsirli bilib və 12 ildən 19 ilədək azadlıqdan məhrum edib. Abbas Hüseyn 20 il azadlıqdan məhrumetmə cəzasına məhkum edilib. O, artıq həbsinin ilk 7 ilini Qobustan həbsxanasında keçirib.

O və bəzi digər fəallar siyasi məhbus kimi tanınıb. 030В60