DQMŞ Tofiq Yaqublunun azad edilməsini və məhbusların hüquqlarına riayət edilməsini tələb edib

Bakı/10.01.23/Turan: Demokratik Qüvvələrin Milli Şurası (DQMŞ) 30 gün müddətinə inzibati həbs cəzasına məhkum edilmiş fəal Bəxtiyar Hacıyevin müdafiəsinə həsr olunmuş 23 dekabr tarixli dinc aksiyada saxlanılan müxalif siyasətçi Tofiq Yaqublunun azad edilməsi tələbi ilə bəyanat yayıb. 

Tofiq Yaqublu yanvarın 5-də saxlandığı Binəqədi rayonunda İnzibati Həbs Olunanların Saxlanılma Mərkəzində mövcud olan qeyri-insani duruma etiraz olaraq aclıq aksiyasına başlayıb.

DQMŞ qeyd edilən təcridxanada qeyri-insani saxlama şəraiti olduğunu qeyd edir.

Belə ki, burada saxlanılanlar bütün saxlanılma müddətində ailə üzvlərilə görüş və onların gətirdiyi sovqatı qəbul etmək hüququndan məhrum edilirlər. Bəzi hallarda hətta vəkillərlə görüşlərin məxfiliyi pozulur.

Bundan əlavə, Azərbaycan dövlət büdcəsindən məhkumların və müvəqqəti saxlanılanların qidalandırılması üçün böyük vəsaitlər ayrılsa da o vəsaitlər korrupsiya yolu ilə mənimsənilir, məhkumlara və saxlanılanlara verilən yeməklər isə o qədər keyfiyyətsiz olur ki, həmin şəxslər onları qəbul etməkdənsə, ac qalmağı üstün tuturlar, deyə DQMŞ-nin bəyanatında bildirilir.

Sənəd müəllifləri qeyd edirlər ki, Yaqublu həbs edildikdən sonra normal qidadan və müalicədən məhrum edilib.

DQMŞ bildirir ki, Yaqublunun xəstə olduğu və ciddi müalicə kursu keçməli olduğu halda normal qidadan da məhrum edilməsi, 23 dekabr tarixindən faktiki qidalana bilməməsi və 5 yanvardan etibarən tam aclığa başlaması onun səhhətinə geridönməz xarakterli zərbələr vura bilər.

DQMŞ Yaqublunun qanunsuz və əsassız inzibati həbsinə etiraz edir və onun azad edilməsini tələb edir.

Bəyanatda həmçinin hakimiyyət "məhkumlara və İnzibati qaydada saxlanılanlara qarşı qeyri-insani və aşağılayıcı davranışlara son qoymağa" çağırılır.

Məhkum edilən və saxlanılan şəxslərin normal qidalandırılması, xəstələrin müalicə müəssisəsinə köçürülərək tibbi nəzarət altına alınması dövlətin konstitusion vəzifəsidir, deyə DQMŞ-nin bəyanatında vurğulanır.

* Demokratik Qüvvələrin Milli Şurasının və Müsavat Partiyasının üzvü Tofiq Yaqublu dekabrın 23-də Bakının mərkəzində ictimai fəal Bəxtiyar Hacıyevə azadlıq tələbi ilə keçirilən etiraz aksiyasında saxlanılıb.

Elə həmin gün Səbail Rayon Məhkəməsi onu kiçik xuliqanlıq və polisə tabe olmama ittihamı ilə 30 gün müddətinə həbs edib. Yanvarın 5-də Bakı Apellyasiya Məhkəməsi bu qərarı qüvvədə saxlayıb. Buna etiraz əlaməti olaraq Yaqublu aclıq elan edib. 06B