Əfqan Muxtarlı aclıq aksiyasını dayandırıb

Bakı/24.09.19/Turan: 16 saylı cəzaçəkmə müəssisəsində aclıq edən jurnalist Əfqan Muxtarlı keçirdiyi aksiyasını dayandırıb.

Bu barədə Turana NİDA Vətəndaş Hərəkatının koordinatoru Samir Əsədli danışıb.

Onun deməsinə görə, jurnalist səhhətində yaranan problemi və ona edilən müraciətləri nəzərə alaraq bu addımı atıb:

"Əfqan şəkərli diabetdən əziyyət çəkir, üç gündür ki, yeməkdən və dərmanlardan imtina etməsi səhhətində ciddi problem yaradıb. Həmçinin, vəkil ona bu gün, sentyabrın 24-də aclığı dayandırmaq üçün çoxsaylı müraciətlər çatdırıb. Əfqan onları da nəzərə alıb".

Penitensiar Xidmətinin İctimaiyyətlə əlaqələr şöbəsinin rəhbəri Mehman Sadıqov da bu məlumatı təsdiqləyib.

Əfqan Muxtarlı aclıq aksiyasına vəkilinə edilən təzyiqlərə etiraz olaraq başlamışdı.

Əfqan Muxtarlı qaçaqmalçılıqda, sərhədi qanunsuz keçməkdə və hakimiyyət nümayəndəsinə zor tətbiq etməkdə ittiham olunaraq 2017-ci ildə həbs edilib.O, ittihamları qurama sayır. 2014-cü cü ildən mühacirətə gedən jurnalst Gürcüstandan oğurlanaraq Azərbaycana gətirildiyini bəyan edib.O bu məsələdə Gürcüstanın hüquq mühafizə orqanlarını da günahkar sayır.Amma həmin vaxt Gürcüstan baş naziri onlara qarşı ittihamların əsasız olduğunu açıqlamışdı.-0-