Əfqan Sadıqovun yeri məlum deyil

Bakı/17.06.20/Turan: “Azel TV” xəbər saytının təsisçisi Əfqan Sadıqov bir aydan artıqdır ki, həbsdədir, lakin ona bir dəfə də olsun doğmaları ilə görüş və ya onlarla telefonla danışmağa imkan verməyiblər.

Ə.Sadıqov mayın 13-də saxlanılıb və Binəqədi Rayon Məhkəməsi onu hədə-qorxu ilə tələb etmək ittihamı ilə 4 ay müddətinə həbs edib.

İstintaqın bildirdiyinə görə, Ə.Sadıqov Xəbərfakt.az nəşrinin redaktoru Sakit Muradov ilə birlikdə 10 min manat rüşvət alarkən cinayət başında saxlanılıb.

Onun xanımı Sevinc Sadıqova Turan agentliyinə bildirib ki, həbsdən sonra onunla bir dəfə olsun görüşməyib və telefonla danışmayıb.

“Harada saxlanıldığını və sağlamlıq vəziyyətinin necə olduğunu bilmirəm. Onun ürəyində  problem var və təzyiqi yüksəkdir. İstintaq telefon danışıqlarına qadağa qoyub. Cəmi bir dəfə vəkil yanına buraxılıb”, - o bildirib.

S.Sadıqova qeyd edib ki, onun həyat yoldaşı ilə birlikdə təqsirləndirilən müttəhim  Sakit Muradov nədənsə azadlıqdadır.

Onun sözlərinə görə, əri həbs olunduqdan sonra o, mənəvi təzyiqə məruz qalır. “Məni şantaj edirlər, danışma, yoxsa sənin intim görüntülərini göstərəcəyik”, - S.Sadıqova kimi nəzərdə tutduğunu konkretləşdirməyib. Qadın onların mənzilində gizli kameranın quraşdırıldığını istisna etmir.

S.Sadıqova bildirib ki, xarici dövlətlərin səfirliklərinin qarşısında etiraz aksiyaları keçirməyi planlaşdırır.

Xatırladaq ki, Əfqan Sadıqov yetkinlik yaşına çatmayanların polis tərəfindən fahişəliyə cəlb edilməsi, din xadimlərinin narkomafiyaya bağlılığı, Sumqayıt Şəhər İcra Hakimiyyətində korrupsiya və s. barədə qalmaqallı yazıları ilə tanınır.

Bu yazılar məhkəmə prosesləri ilə nəticələnib ki, Ə. Sadıqov mühakimə olunub.-03B06-