Ekspert son günlər baş vermiş ağır yol qəzalarının səbəbləri barədə

Bakı/03.10.18/Turan: Sıxlaşan yol qəzalarının baş verməsinə səbəb bəzi sürücülərin qeyri-peşəkarlığı və yol hərəkəti qaydalarına riayət etməməsidir. Nəqliyyat sahəsi üzrə ekspert Ərşad Hüseynov belə hesab edir.

Onun fikrincə, Bakıda oturuşmuş, müasir tələblərə cavab verən ictimai nəqliyyat sistemi yoxdur. "BakuBus" istisnadır və bu sistemə irad yoxdur. Amma Bakıda fəaliyyət göstərən 2000 avtobusdan ancaq 300-ü "BakuBus"a aiddir. Qalan daşıyıcılar isə sərnişindaşıma qayda və tələblərinə ciddi yanaşmırlar.

Marşrut sahiblərinin bəzisinin əsas məqsədi daha çox pul qazanmaqdır. Sürücüyə plan qoyulub. Sürücü də yol hərəkəti qaydalarına məhəl qoymur, kütləvi şəkildə hərəkət qaydalarını pozur. Digər səbəblərdən biri yol infrastrukturunun quruluşu, piyada yollarının olmaması və ya zəbt edilməsi, yolların nişanlanmasındakı qüsurlardır.

Oktyabrın 1-də Binə qəsəbəsində baş vermiş yol qəzasına gəlincə, aydın şəkildə görünür ki, dəmir yolu hərəkətinin təşkilində qüsur var, ekspert qeyd edib.

"Foto-video çəkilişlərdə aydın görünür ki, şlaqbaum yoxdur, hələ dəmir yoluna çatmamış xəbərdarlıq nişanları yoxdur. Bir neçə digər dəmir yolu keçidlərində də bu, belədir. Vəziyyətin yaxşılaşdırılması üçün hökumət səviyyəsində kompleks tədbirlər görülməlidir.

Xatırladaq ki, sentyabrın 30-da Sumqayıtda avtobusla yük maşınının toqquşması nəticəsində 4 nəfər həlak olub, 14 nəfər xəsarət alıb. Oktyabrın 1-də avtobusla qatarın toqquşması nəticəsində iki nəfər həlak olub, 34 nəfər yaralanıb.16C06-