Əli Həsənovun həyat yoldaşının liseyinin keçmiş mühasibəçiləri aclıq elan ediblər

Bakı/31.10.19/Turan: Oktyabrın 2-də Bakı Ağır Cinayətlər Məhkəməsində Azər Paşayevin sədrliyi ilə "Kaspi Liseyi ümumtəhsil məktəbi" MMC-də 564 min manatın mənimsənilməsi haqqında iş üzrə növbəti iclas keçirilib.

İş üzrə təqsirləndirilənlər liseyin iki mühasibəçisi - Tural Məmmədov və Fərahim Möhbalıyevdir. Onlar liseyin təsisçisi Sona Vəliyevanın - Azərbaycan prezidentinin köməkçisi Əli Həsənovun həyat yoldaşının şikayəti əsasında həbs ediliblər və CM-in 179.4-cü maddəsi (böyük ölçüdə mənimsəmə) ilə ittiham olunublar.

İclasda hər iki təqsirləndirilən şəxs "ölüm aclığı" elan edib və öz valideynlərinə vəsiyyətnamə göndəriblər. Onlar qeyd ediblər ki, Əli Həsənovun təzyiqləri nəticəsində onların işinə ədalətli baxılmadığına görə bu addımı atırlar. Əgər aclıq aksiyası nəticəsində ölərlərsə, buna görə birinci günahkarlar Əli Həsənov və xanımıdır.

Hər iki təqsirləndirilən şəxs bildirib ki, aclığa başladıqları haqqında Bakı İstintaq Təcridxanasının rəisi Elnur Əliyevə rəsmi olaraq məlumat veriblər.

Müttəhimlərin vəkilləri isə oktyabrın 2-də növbəti dəfə liseyin təsisçisi Sona Vəliyevanın məhkəməyə çağırılması barədə vəsatət qaldırıblar. Onlar bunu 564 min manatın mənimsənilməsi barədə rəyin Sona Vəliyevanın sözləri, onun təqdim etdiyi rəqəmlər əsasında verilməsi ilə əsaslandırıblar.

"Məsələn, audit rəyində göstərilib ki, "İyun ayında təsisçi 100 min manat ödəyib". Hara ödənilib? Necə ödənilib? Bununla bağlı nə sübut var? Sona Vəliyevanın tərtib etdiyi iki sənəd əsasında adamlara ağır ittiham verilib, onu da nə istintaqda çağırıb dindiriblər, nə də məhkəmədə...", deyə vəkil Elçin Sadıqov etiraz edib.

Digər vəkil Adəm Məmmədov da Sona Vəliyevanın çağırılmasının vacib olduğunu vurğulayıb:

Hakim Azər Tağıyev növbəti dəfə vəsatəti rədd edib. Bu zaman təqsirləndirilən şəxslər etiraz edib.

"İlk imkanda özümə qəsd edəcəyəm, qanımı tökəcəyəm. Birinci günahkar Əli Həsənov və Sona Vəliyeva olacaq, ikinci günahkar da siz. Bu qədər ədalətsizlik olmaz!", Fərahim Möhbalıyev belə deyib.

Müttəhim Tural Məmmədov bildirib ki, onu heç bir qeydiyyat olmadan ötən il oktyabrın 16-dan 30-na qədər Baş Mütəşəkkil Cinayətkarlığa Qarşı Mübarizə İdarəsində saxlayıblar: "Əli Həsənovun bir zəngi ilə elədilər bu qanunsuzluğu. 20 min pulumu, 30 minə dəyərləndirib maşınımı aldılar. Bəs niyə mənimsənildiyi iddia olunan məbləğdən çıxmadılar?", deyə o bildirib.

Təqsirləndirilən şəxslər işin ibtidai istintaqa qaytarılması barədə vəsatət qaldırıblar. Hakim bu vəsatəti də təmin etməyib.

Daha sonra təqsirləndirilən şəxslərin etirazlarına baxmayaraq, məhkəmə istintaqının başa çatdığı elan edilib. Prokurora isə çıxışa hazırlaşmaq üçün oktyabrın 11-nə qədər vaxt verilib.

* İttihamda qeyd edilir ki, 2018-ci ilin aprel-oktyabr aylarında liseyin 454 şagirdinin təhsili üçün 1 mln. 366 min manat ödənilib. Amma baş mühasib və mühasib bu məbləğin 564 min manatını mənimsəyib və bu məbləği hesabata daxil etməyib.

Baş mühasib Məmmədov özünü qismən təqsirli bilib, şəxsi ehtiyacları üçün 564 min deyil, 350 min manat götürdüyünü bildirib. Onun sözlərinə görə, təsisçi Vəliyeva ona bütün məbləği öz üzərinə götürməyi təklif edib, polisə şikayət etməyəcəyinə söz verib. "Mən, ona inanaraq izahat yazdım və pulu qaytarmaq üçün 1 il vaxt istədim", deyə Məmmədov məhkəmədə bildirib. Möhbalıyev özünü təqsirli bilməyib. -21C-