Əli Kərimlinin mühafizəçisinin işi üzrə istintaq yekunlaşıb

Bakı/09.02.21/Turan: Xalq Cəbhəsi Partiyasının lideri Əli Kərimlinin mühafizəçisi Niyaməddin Əhmədovun işi üzrə ibtidai istintaq yekunlaşıb. İş baxılması üçün Bakı Ağır Cinayətlər Məhkəməsinə göndəriləcək. Bu barədə Turan-a müxalifətçinin atası Arif Əhmədov bildirib.

2020-ci il aprelin 16-da Bakının Xətai rayon məhkəməsi Niyaməddin Əhmədovu karantin rejiminin pozulması və polisə tabe olmama ittihamı ilə 30 gün müddətinə həbs edib. Aprelin 28-də o, inzibati qaydada həbs olunanların saxlanılma məntəqəsindən naməlum yerə aparılıb, burada amansız işgəncələrə məruz qalıb. Ondan Əli Kərimliyə qarşı ifadə vermək tələb olunub.

İnzibati həbs müddəti başa çatdıqdan sonra mayın 16-da Əhmədova qarşı CM-in 214-1-ci (terrorçuluğun maliyyələşdirilməsi) maddəsi ilə ittiham irəli sürülüb. Hüquq müdafiəçiləri N.Əhmədovu siyasi məhbus kimi tanıyıblar.

Yanvarın 18-də ona qarşı yeni itihamlar irəli sürülüb CM-in 233-1.2.1 (bir qrup şəxs tərəfindən qanunla mülki dövriyyədə olmasına yol verilməyən əşyaları əldə etmə, saxlama) və 28.281.2 (dövlət əleyhinə yönələn açıq çağırışlara hazırlıq, təkrarən və ya bir qrup şəxs tərəfindən törədildikdə) maddələri ilə yeni ittihamlar irəli sürülüb. -16B06-