Ərəstun Oruclu: "Biz geosiyasi proseslərin qaynar nöqtəsinə gəlib çıxmışıq”

Bakı/07.10.23/Turan: Əfqanıstan vətəndaşının Azərbaycandakı xarici səfirliyə qarşı terror aktının planlaşdırılmasında iştirakı barədə məlumat təəccüb doğurmamalıdır. Bir ölkənin vətəndaşının digər ölkəyə qarşı üçüncü ölkənin xüsusi xidmət orqanları və yaxud üçüncü ölkənin ərazisində yerləşən terrorçu təşkilatlar tərəfindən istifadə olunması adi praktikadır.

Bu fikri Azərbaycanın  xüsusi xidmət orqanlarının keçmiş zabiti, politoloq Ərəstun Oruclu Əfqanıstan vətəndaşının Azərbaycan ərazisində, o cümlədən xarici səfirliyə qarşı terror aktlarının planlaşdırılmasında ittiham olunaraq həbs edilməsilə bağlı Dövlət Təhlükəsizliyi Xidmətinin bugünkü məlumatını “Amerikanın səsi” radiosuna şərh edərkən bildirib.

"Bu baxımdan cinayətin səbəb və motivlərini müəyyənləşdirmək üçün obyektiv araşdırma aparmaq olduqca vacibdir", - Oruclu qeyd edib.

O, diqqəti bölgədəki mürəkkəb geosiyasi vəziyyətə yönəldib.

"Biz geosiyasi proseslərin tam qaynar nöqtəsinə gəlib çıxmışıq. Bölgədə maraqları olan dövlətlər, təşkilatlar, fərqli i qurumlar əlbəttə ki, bütün vasitələrə əl atacaqlar. Burada siyasi təzyiq vasitəsi ola bilər. Burada təzyiq vasitəsi kimi iqtisadi faktorlardan istifadə oluna bilər. Çox universal alət olan terror amilindən də istifadə oluna bilər”, - Oruclu sözlərinə davam edib.

Onun fikrincə, Azərbaycana qarşı ən müxtəlif təxribatlar mümkündür. Onlara hazır olmaq lazımdır. Onların qarşısını almaq üçün müvafiq profilaktik tədbirlər həyata keçirilməlidir.

Lakin Oruclu hesab edir ki, əsas məsələ real təhlükə hallarını araşdırıb üzə çıxarmaq və real şəxsləri, real cinayətin arxasında duranı, yaxud planlaşdırılan terror aktının arxasında duran qurumları, dövlətləri aşkarlayıb üzə çıxarmaq və onların qarşısına faktı qoymaqdır.

Amma eyni zamanda o qeyd edib ki, “siyasi konyuktura” məqsədilə hansısa terror aktından və yaxud başqa məsələlərdən daxili siyasi məqsədlər üçün istifadə olunmalıdır. Onun fikrincə,  əvvəllər belə hadisələr olub. 16В