Fəal Məhbub Zülfüqarlı bildirib ki, İmişlidə onu maşınla vurmağa cəhd ediblər

Bakı/06.11.19/Turan:  Çərşənbə günü İmişlidə yaşayan jurnalist və fəal Məhbub Zülfüqarlını maşınla vurmağa cəhd ediblər. 

“Noyabrın 6-da saat 12:38-də İmişlinin mərkəzində məni avtomobillə vurmağa cəhd etdilər. Mən tez-tez həmin yerə yaxınlıqda işləyən tanışımın yanına gedirəm.   Bu gün onun yanından çıxdıqdan sonra Həzi Aslanov küçəsini keçərkən “Jiquli” markalı avtomobilin böyük sürətlə yanımdan keçdiyini gördüm. Həmin küçədə nəqliyyatın hərəkəti adətən       20-30 km/s-nı ötmür. Lakin bu maşın böyük sürətlə yanımdan ötdü. Mən öncə geri çəkilmək istədim, ancaq gördüm ki, avtomobil yenə də üstümə gəlir. O zaman tez irəliyə qarşı zolağa keçdim. Orada hərəkət edən avtomobil əyləcə basa bildi və mən yolu keçə bildim”, - M.Zülfüqarlı Turan agentliyinə bildirib. 

O deyib ki, noyabrın 7-də insidentin araşdırılması xahişilə DİN-ə və Azərbaycan prezdenti İlham Əliyevə müraciət edəcək. 

Onun sözlərinə görə, ətrafda bir sıra dövlət müəssisəsi var, məsələn, Baş Poçt İdarəsi, Təhsil İdarəsi, çoxlu özəl obyekt var və avtomobillin onun üstünə sürməsi anı videomüşahidə kamerasının kadrlarına düşə bilər. 

M.Zülfüqarlı güman edir ki, sui-qəsdin arxasında yerli hakimiyyət və güc qurumları dura bilər.

Belə ki, bu yaxınlarda o, KİV-də yazıb ki, yerli güc qurumlarından birinin oğlu  oktyabrın 19-da Bakıda mitinqdə AXCP lideri Əli Kərimlini saxlayan və döyən şəxslərin arasında olub.  

“Biz uzun illər hüquq müdafiəçisi Oqtay Gülalıyevlə əməkdaşlıq edirik. Görünür, onunla baş verənlər  kimisə mənə qarşı sui-qəsdə “ruhlandırıb”. Korrupsiya faktlarının ifşa edilməsinə görə mən və qardaşlarım daim təzyiq altındayıq, törətmədiyimiz yol hərəkəti qaydalarına görə bizi cərimələyirlər,   vergi iddiaları irəli sürürlər. Məni bir dəfə uydurma ittihamla yarım il həbs ediblər”, - M.Zülfüqarlı qeyd edib.

İmişli rayon hüquq-mühafizə orqanlarından şərh almaq mümkün olmayıb.

M.Zülfüqarlı “Kür” Vətəndaş Cəmiyyətinin qərargahının işində iştirak edib.Cəmiyyət 2010-cu ilin yazında Kür çayında dağıdıcı daşqınlar zamanı zərər çəkmiş yerli sakinlərin hüquqlarını müdafiə edib.  

2017-ci ilin iyulunda İmişlidə yerli məmurlardan birinin xüsusi ittiham qaydasında irəli sürdüyü böhtan iddiası üzrə azadlıqdan məhrum edilmişdi.   06D-