Fuad Əhmədli barəsində hökm siyasi motivlidir � hüquq müdafiəçisi

Bakı/17.06.17/Turan: Siyasi Məhbusları Müdafiə Mərkəzi Xalq Cəbhəsi Partiyasının fəalı Fuad Əhmədlinin 4 il müddətinə azadlıqdan məhrum edilməsi haqqında hökmü qətiyyətlə pisləyib.

Hüquq müdafiə təşkilatı hesab edir ki, Əhmədli siyasi sifarişlə həbs və mühakimə edilib.

Mərkəzin bəyanatında qeyd edilir ki, Əhmədli facebook-da hakimiyyətin və korrupsiyaya uğramış məmurların ünvanına tənqidi statuslar dərc edirdi, etiraz mitinqlərinin təşkilində iştirak edirdi, buna görə dəfələrlə inzibati həbslərə məruz qalıb.

2016-cı ilin avqustunda Əhmədli barəsində AR CM-in 302.1 (axtarış fəaliyyəti həyata keçirmək səlahiyyətinə malik olmayan şəxslərin belə tədbirlər keçirməsi) və 308.1-ci (vəzifə səlahiyyətlərindən sui-istifadə) maddələri ilə cinayət işi açılıb.

"Saxama, istintaq və məhkəmə prosesi Azərbaycan qanunvericiliyinin və beynəlxalq hüquq normalarının kobud şəkildə pozulması ilə keçirilib.

Şahidlərə təzyiq göstərilib. "Zərərçəkmişlərdən" biri uzun müddət cinayət törətmək şübhəsi ilə axtarışda olub, amma bununla belə, onun "yazılı" ifadələrini "dəlil" kimi qəbul ediblər, vəkilin bütün vəsatətlərini isə hakim təmin etməyib", deyə Mərkəzin rəhbəri Elşən Həsənov Turan-a bildirib.

Məhkəmə ədalətli məhkəmə təhqiqatı prinsipini təmin etməyib, bu da Avropa Konvensiyasının 6-cı maddəsinin pozuntusudur.

Əhmədli 1 saylı istintaq təcridxanasında saxlanılarkən dəfələrlə və səbəbsiz olaraq karserə salınıb, deyə Həsənov qeyd edib.

Əhmədli 1 ilə yaxın əsassız olaraq həbsdə saxlanılıb və beləliklə, onun barəsində Avropa Konvensiyasının 5-ci - "Azadlıq və şəxsi toxunulmazlıq hüququ" maddəsi pozulub.

Ağır ağ ciyər xəstəliyinə baxmayaraq, Əhmədli istintaq təcridxanasında zəruri tibbi yardımdan məhrum olub. 2014-cü ildə o, ağ ciyərindən əməliyyat olunub və müntəzəm olaraq həkim nəzarəti altında olmalıdır. Vəkil Əsabəli Mustafayev həkimlərin rəyini məhkəməyə təqdim edib, amma o, nəzərə alınmayıb. Buna görə Avropa Konvensiyasının 3-cü (işgəncələrin qadağan edilməsi) maddəsinin pozulmasından danışmaq üçün də əsas var.

Xatırladaq ki, 2017-ci il iyunun 16-da Bakı Ağır Cinayətlər Məhkəməsi Əhmədli barəsində 4 il azadlıqdan məhrumetmə hökmü çıxarıb.

"Siyasi Məhbusları Müdafiə Mərkəzi Fuad Əhmədli barəsində hökmü qanunsuz, əsassız və siyasi motivli, məhkəmə prosesini isə "sifarişli", hüquq normalarına zidd hesab edir. Biz Fuad Əhmədlinin dərhal azad edilməsini tələb edirik", deyə Mərkəzin bəyanatında qeyd edilir.

* Siyasi Məhbusları Müdafiə Mərkəzi 2014-cü ilin payızında bir qrup keçmiş "vicdan məhbusu" tərəfindən yaradılıb. -06D-