Fuad Əhmədlinin işi üzrə məhkəmədə vəsatətlər təmin edilməyib

Bakı/02.08.17/Turan: Azərbaycan Xalq Cəbhəsi Partiyasının (AXCP) həbsdəki üzvlərindən Fuad Əhmədlinin apellyasiya şikayətinə baxış vəkillərin vəsatətlərinin təmin edilməməsi ilə başlayıb.

Avqustun 2-də keçirilən ilk iclasda F.Əhmədlinin vəkillərindən Əsabəli Mustafayev məhkəmə qarşısında bir neçə vəsatətlə çıxış edib. Vəkilə məhkəmə prosesi barədə məlumat gec verildiyi üçün vəsatətlər şifahi təqdim edilib.

Vəsatətlərdən biri F.Əhmədlinin vəkilinin yanında əyləşməsi ilə bağlı olub, amma hakim bu vəsatətlə bağlı rəyi "konvoy"ların ixtiyarına buraxıb. Buna ehtiyac olmadığı üçün vəsatət təmin edilməyib.

Vəkillər məhkəmə iclas protokollarının sonradan təhrif olundugunu əsas gətirərək məhkəmə prosesinin audio-video çəkilişlərinin aparılmasına icazə istəyiblər, bu vəsatət də rədd edilib.

F.Əhmədlinin barəsində cinayət işinə bəraətverici əsaslarla xitam verilməsi, seçilmiş həbs qətimkan tədbirinin dəyişdirilməsi, apellyasiya şikayətinə qismən məhkəmə istintaqı ilə baxılması barədə vəsatətlərin də heç biri təmin edilməyib. Dövlət ittihamçısı həmin vəsatətlərin hamısının əleyhinə çıxıb.

Vəsatətlər rədd edildikdən sonra məhkəmə heyəti prosesi avqustun 16-dək ertələyib. F.Əhmədlinin vəkilləri apellyasiya şikayətlərində ona bəraət verilməsini tələb edirlər.

Xatırladaq ki, F.Əhmədli 2016-cı il avqustun 17-də saxlanılıb. İttihama görə, o, işlədiyi "Azerfon" şirkətində texniki vasitələrdən istifadə etməklə bir sıra müştərilər haqda fərdi məlumatları kənar şəxslərə ötürüb. Həmçinin iddia olunur ki, Fuadın həbsindən sonra onun yaşadığı evdə aparılan axtarış nəticəsində Fətullah Gülənə aid materiallar olan disklər, kitablar tapılıb. F.Əhmədli Cinayət Məcəlləsinin 302.1 (əməliyyat-axtarış fəaliyyəti haqqında qanunvericiliyi pozma) və 308.1 (vəzifə səlahiyyətlərindən sui-istifadə) maddələri ilə ittiham olunub.

Ötən ay Bakı Ağır Cinayətlər Məhkəməsi onu 4 il azadlıqdan məhrum edib.

F.Əhmədli və AXCP ittihamı rədd edir, həbsi siyasi fəaliyyətlə əlaqələndirir.-05B-