Gənclər memarlıq abidəsinin sökülməsinin qarşısını almağa davam edirlər

Bakı/07.05.19/Turan: Onlarla gənc Bakının mərkəzində tarixi binanı qorumağa davam edir. Qeyri-rəsmi məlumatlara görə, binanı sökmək istəyirlər.

Mayın 6-ı axşamdan polis S.Rüstəm küçəsi, 10 ünvanındakı ikimərtəbəli binanın boşaldılmasına bir neçə dəfə cəhd edib. Lakin gənclər, müxtəlif ictimai birliklərin və qrupların üzvləri onlara tabe olmaqdan imtina edirlər.

Gənclər Facebook-da kampaniyaya başlayaraq vətəndaşları binanın sökülməsinə yol verməməyə çağırıblar.

Bundan sonra xarici diplomatlar və ictimai xadimlər binaya gələrək gənclərin aksiyasını dəstəkləyiblər.

Binanın qorunmasının təşəbbüsçüləri birinci vitse-prezident Mehriban Əliyevaya müraciət edərək onun müdaxilə etməsini və binanın sökülməsinə yol verməməsini xahiş ediblər.

Binaya gəlincə, rəsmi şəxslərdən kimsə onun dəyəri və söküntü planları barədə açıqlama verməyib.

Bu bina 1913-cü ildə molokanların ibadət evi kimi inşa edilib. Sovet dönəmində burada Rabitə Nazirliyinin Radio Evi yerləşib. Postsovet dövründə bina boş qalıb və faktiki olaraq sahibsiz olub. Son vaxtlar "Salaam Cinema"nın entuziastları oranı sahmana salaraq kino nümayiş etdirirdilər. Məhz həmin gənclər binanın mühafizəsinə qalxıblar. -16B-