“General Həzi Aslanov” tankerində partlayış

Bakı/25.10.20/Turan: Azov dənizində “General Həzi Aslanov” tankerində baş vermiş partlayışdan sonra xilasetmə əməliyyatı həyata keçirilir. Bu barədə RBK-ya “Rosmorreçflot”un mətbuat xidmətindən bildiriblər.

Hadisə haqqında məlumat oktyabrın 24-də saat 18:40-da daxil olub – ikinci tankda partlayış baş verib. “Gəmi Rostov-na-Donu şəhərinə gedirdi, bundan əvvəl Kerçensk boğazından keçib, o, artıq çıxışda, bilavasitə Azov dənizində idi”, deyə “Rosmorreçflot”dan bildiriblər. 

Gəmi ekipajı 13 nəfərdən ibarətdir, onlardan 10 nəfərini yaxınlıqdan keçən “Sirius” gəmisi xilas edib. Göyərtədə olmayan üç nəfəri xilasedicilər axtarır. Bu zaman gəmidə yanğın başlayıb, o, suda qalıb. “Merkuri”, “İmpuls” və “Aleksandr Sizotsev” xilasetmə gəmiləri hadisə yerinə gəliblər.

FHN-dən RBK-ya bildiriblər ki, tanker boş gedirdi. TASS-ın məlumatına görə, partlayış, ehtimala görə, yanacaq buxarı qalıqları səbəbindən baş verib.

Hazırda Temryukda operativ xilasedicilər qrupu icra hakimiyyəti orqanları ilə birgə tankerin itkin düşən üç ekipaj üzvünün axtarışı üzrə əməliyyatlar həyata keçirir.

“Rosmorreçflot”un mətbuat xidmətindən bildiriblər ki, Azov dənizində partlayışdan sonra qəzaya uğrayan “General Həzi Aslanov” gəmisi FH yerindən təxminən 8 kilometr məsafədə yerləşən lövbər dayanacağına çəkiləcək.

Real zaman rejimində gəmilərin hərəkətini izləməyə imkan verən Vessel Finder servisinin məlumatına görə, “General Həzi Aslanov” tankeri Kerçdən Rostov-na-Donu şəhərinə gedirdi, 25 oktyabr saat 6:00-da oraya çatmalı idi.

Gəminin sahibi kimi Türkiyənin Palmali Shipping Agency şirkəti qeyd olunur, tanker 2005-ci ildə Türkiyədə tikilib, amma Rusiya bayrağı altında üzürdü. Gəminin qeydiyyat limanı Taqanroqdur. -0-