Gürcüstanda azərbaycanlıların erkən nikahı haqqında cinayət işi açılıb

Bakı/11.02.21/Turan: Gürcüstanda yetkinlik yaşına çatmamış azərbaycanlıların nişanından yayılmış videogörüntülərlə bağlı açılmış cinayət işi çərçivəsində araşdırma başlayıb. Tbilisinin azərbaycanlıların məskunlaşdığı uzaq rayonunda təxminən 11 yaşlarında məktəbli qız 14-15 yaşlı yeniyetmə ilə nişan mərasimində iştirak edir. Hamı Azərbaycan dilində danışır.

Baş verənlər Gürcüstanda narazılıq doğurub və yerli qanunvericiliyə ziddir. Araşdırma Gürcüstan Cinayət Məcəlləsinin 150-ci maddəsi ilə başlayıb, bu maddə yetkinlik yaşına çatmamış şəxslərin nikaha təhrik edilməsinə görə cəza nəzərdə tutur. Gürcüstanın Xalq müvəkkili ofisi də araşdırmaya daxil olub.

Yetkinlik yaşına çatmamış şəxslərin nişanı olduğu güman edilən işlə Azərbaycan ombudsmanı Səbinə Əliyeva da maraqlanıb. O, kömək üçün Gürcüstanlı həmkarı Nino Lomcariyaya müraciət edib. Əliyeva Gürcüstan hakimiyyətindən bu faktın operativ araşdırılmasını və yetkinlik yaşına çatmamış şəxslərin hüquqlarının müdafiəsini təmin etməyi xahiş edib.

Qızın ailəsi sosial şəbəkədəki məlumatların yalan olduğunu bildirir. “Videoya nikah deyil, yalnız ailənin razılığı çəkilib. Toy isə üç il sonra, qızın 18 yaşı tamam olduqdan sonra olacaq”, deyə ailənin qohumu süjet hazırlamaq üçün Tbilisinin Poniçala rayonuna gedən Azərbaycan telekanalının müxbirinə bildirib (JamNews).

Oğlanın və qızın adı açıqlanmır.

Bir çox azərbaycanlı və gürcü fəallar Gürcüstanın qızların nikaha məcbur edilməsi ilə bağlı qanunvericiliyini sərtləşdirməyi tələb edirlər. Qanunda nişanla bağlı heç nə deyilmir.

“Nişan erkən nikaha gedən yoldur və o da erkən nikah kimi qadağan edilməlidir”, deyə azərbaycanlı icmanın sıx yaşadığı Kvemo Kartli regionundan vətəndaş fəalı Samirə Bayramova öz Facebook səhifəsində yazıb.

Gürcüstan DİN-in məlumatına görə, 2019-cu ildə ölkədə uşaqlarla nikah kimi tövsif edilmiş 175 cinayətin üstü açılıb. 2018-ci ildə də, demək olar ki, eyni sayda belə cinayət aşkar edilib – 176 hadisə. Gürcüstanın bir neçə regionunda, o cümlədən Açar regionunun dağlıq hissəsində və etnik azərbaycanlıların sıx şəkildə yaşadığı yerlərdə belə cinayətlər xüsusilə tez-tez baş verir. Bu yerlərdə erkən nikahlar adi haldır və yerli sakinlərin dediyinə görə, yerli ənənələrin bir hissəsidir. -0-