yasamal.mida.gov.az

yasamal.mida.gov.az

Bakı/11.07.22/Turan:Güzəştli mənzillərlə bağlı mart ayında aparılan satışların nəticələri ləğv edildi. Yasamal Yaşayış Kompleksinin ikinci mərhələsi üzrə inşa edilən 442 mənzil vətəndaşlara yenidən təqdim olunacağı qeyd olundu.

Bu barədə birgə açıqlama yayan Dövlət Təhlükəsizliyi Xidməti və Mənzil İnşaat Dövlət Agentliyi bu dəfə mənzil seçiminin ədalətli, şəffaf və bərabər şəraitdə keçirilməsini təmin edəcəklərini deyirlər. 

Bənzər təcrübə əvvəl də olmuşdu, amma o zaman satışların nəticələri ləğv edilməmişdi.

Həmin nəticələrlə bağlı da qərar ola bilərmi? Bu cür halların təkrarlanmaması üçün hansı addımlar atılmalıdır?  

Mənzil İnşaat Dövlət Agentliyindən (MİDA) Turan-a bildirilib ki, mənzil seçimi prosesi iki mərhələdən ibarətdir. İlk mərhələdə mənzil seçimi aparılır. Daha sonra isə mənzil sifarişi mərhələsi gəlir. Burada bina, mərtəbə, otaq sayı seçilir.

Qurumdan qeyd olunub ki, vətəndaş 10 dəqiqə ərzində seçimini təsdiq etməlidir. Əks təqdirdə həmin mənzil üzrə digərlərinin seçimi üçün funksiya aktivləşir.

Vurğulanıb ki, mənzillərin seçimi barədə elan onun verilməsi tarixindən ən azı 30 gün əvvəl verilir. Hər elandan sonra təxminən 1 ay müddətində güzəştli mənzilin DEMO versiyası açılır. Elektron kabinetə sahib olan şəxslər həmin versiyada seçim üsullarına baxır, sistem barədə məlumatlı olurlar.

MİDA-dan bildirilib ki, sistem hər bir istifadəçinin seçim etməsi üçün rahat interfeysə malikdir. Güzəştli mənzil» sistemi agentliyin sərəncamında olan mənzillərin güzəştlə əldə olunması sahəsində ölkə vətəndaşlarına elektron xidmətlərin mərkəzləşdirilmiş qaydada göstərilməsini həyata keçirir. Onun əsas məqsədi mənzilləri güzəştlə almaq istəyən şəxslər üçün bərabər şərait yaratmaq, mənzillərin seçilməsi və alınması prosedurunu sadələşdirmək, vətəndaşların müraciətlərinə baxılması zamanı şəffaflığı və operativliyi təmin etməkdir.

Qeyd olunub ki, hazırda sistemin təkmilləşdirilməsi istiqamətində işlər gedir. DEMO versiya ilə əsl versiya eyni hazırlandıqdan belə müdaxilə etmək mümkün olub. Buna görə də versiyalar arasında fərqlər ola bilər. Sistemdə işlər yekunlaşdıqdan sonra növbəti mərhələ elan olunacaq və bir ay əvvəldən mənzil seçimi ilə bağlı elan veriləcək. Əvvəlki seçimdə iştirak edən şəxslərə də heç bir məhdudiyyət tətbiq edilməyəcək.

İqtisadçı Natiq Cəfərli isə bildirib ki, bu sistemlə mənzillərin şəffaf satışını təşkil etmək çətindir: "Çünki həddindən artıq çoxlu sayda ev almaq istəyənlər var".

Onun fikrincə, problemin həlli üçün ən yaxşı yol - həmin evləri almağa hüququ çatan insanların arasında şəffaf şəkildə lotereyanın keçirilməsidir: "Çünki başqa cür insanları inandırmaq mümkün olmayacaq. Lotereya canlı yayımda aparılmalı, komissiyanın tərkibi sivil toplum, jurnalistlərdən ibarət olmalıdır. Adı qutudan çıxan şəxslərə də mənzillər verilməlidir. Başqa cür mümkün deyil".

Ekspert qeyd edib ki, bu, birinci belə hal deyil: "Sadəcə, bu dəfə səs-küy çox oldu deyə rəsmi qurumlar nəticələri ləğv etməli oldu".

Martın 30-da Mənzil İnşaatı Dövlət Agentliyinin (MİDA) Yasamal Yaşayış Kompleksində yerləşən 442 mənzilin seçim prosesi baş tutduqdan sonra şübhəli hallar müəyyənləşdirilib. 

Rəsmi məlumata görə, 442 mənzilin güzəştlə verilməsi prosesi yerinə yetirilərkən kənardan müxtəlif şəxslər tərəfindən informasiya texnologiyaları sahəsində xüsusi kompüter proqram təminatlarından istifadə edilməklə mənzillərin seçimi prosesinə müdaxilə halları müşahidə edilib və bu məsələnin araşdırılması üçün aidiyyəti üzrə Dövlət Təhlükəsizliyi Xidmətinə müraciət olunub. 

Araşdırmalarla müəyyən olunub ki, mənzillərin 60 faizdən çoxu müdaxilə nəticəsində qeyri-qanuni yolla seçilib. 

Faktla bağlı Cinayət Məcəlləsinin 273.3.1 və 273.3.2-ci maddələri ilə cinayət işi başlanılaraq müəyyən edilib ki, Azərbaycan vətəndaşları Elçin Elman oğlu Məmmədov, Ruslan Afiz oğlu Hacıyev, Firudin İlqar oğlu Hüseynov, Yunis İltimas oğlu Lətifzadə, Tərlan Tahir oğlu Abdullayev və Cavid Fəhrad oğlu Məmmədov digərləri ilə əlbir olub ayrı-ayrı qruplar halında MİDA-nın «Güzəştli mənzil» informasiya sisteminə daxil olmaq, oradakı məlumatları dəyişmək hüququ olmadan maddi maraq zəminində onlara müraciət etmiş şəxslərin güzəştli şərtlərlə mənzil əldə etmələrini təmin etmək məqsədilə xüsusi kompüter proqram təminatları hazırlayıblar. Onlar 30 mart 2022-ci il tarixdə "Güzəştli mənzil" informasiya sisteminə daxil olub və kompüter məlumatlarını qəsdən təkrar dəyişdirərək qanunsuz müdaxilə edib, bu hərəkətləri ilə hüququ olan vətəndaşların ümumi və bərabər əsaslarla güzəştli mənzil əldə etmək imkanını məhdudlaşdırmaqla və dövlət orqanlarının normal fəaliyyətinə mane olmaqla əhəmiyyətli zərər vurublar. Həmin şəxslər Cinayət Məcəlləsinin 273.3.1 və 273.3.2-ci maddələrində nəzərdə tutulan cinayət əməllərini törətməkdə şübhəli bilinərək təqsirləndirilən şəxs qismində cinayət məsuliyyətinə cəlb ediliblər. -0--

Rəy yaz

Cəmiyyət

Сможет ли Москва сорвать уход Еревана под крыло Запада? - беседа с экспертом по Центральной Азии Аркадиtv Дубновым в программе "Çətin sual"




Bizi sosial şəbəkələrdə izləyin

Xəbər lenti