Həbsdə olan jurnalistin xanımı təkbaşına aksiya keçirib

Bakı/19.06.20/Turan:  “Azel TV” xəbər saytının təsisçisi, həbsdə olan Əfqan Sadıqovun xanımı Sevinc Sadıqova bu gün baş prokuror yanında Korrupsiyaya Qarşı Mübarizə İdarəsinin binası qarşısında etiraz aksiyası keçirib.

O, həyat yoldaşının saxlandığı yer haqda məlumatın olmamasına və onunla telefon danışığına, görüşə imkan verilməməsinə etiraz edib.

S.Sadıqova avtomobil yolunun ortasında duraraq yolu  bağlamağa çalışıb və yoldan keçənləri ona qoşulmağa çağırıb.

O, plakat qaldırıb: “Mən öz dövlətimdən ədalət istəyirəm! Qanunlara ədalət! Məhkəməyə ədalət!”. Mülki geyimli şəxslər ona yoldan çıxmağı təklif ediblər. Nəhayət, onu idarənin binasına dəvət ediblər.

Xatırladaq ki, Ə.Sadıqov mayın 13-də saxlanılıb. Binəqədi Rayon Məhkəməsi onu hədə-qorxu ilə tələb etmək ittihamı ilə 4 ay müddətinə həbs edib.

İstintaqın bildirdiyinə görə, Ə.Sadıqov Xəbərfakt.az nəşrinin redaktoru Sakit Muradov ilə birlikdə 10 min manat rüşvət alarkən cinayət başında saxlanılıb.

Xatırladaq ki, Əfqan Sadıqov yetkinlik yaşına çatmayanların polis tərəfindən fahişəliyə cəlb edilməsi, din xadimlərinin narkomafiyaya bağlılığı, Sumqayıt Şəhər İcra Hakimiyyətində korrupsiya və s. barədə qalmaqallı yazıları ilə tanınır.

Bundan öncə o, Cəlilabad rayon məmurlarını tənqid etdiyinə görə mühakimə olunmuşdu. -03B06-