Hökumət COVID-19-a görə bağlanan şəhərlərdə sahibkarlara kömək edəcək

Bakı/07.11.20/Turan: Azərbaycan Nazirlər Kabinetinin karantin rejiminin sərtləşdirilməsinə dair 6 noyabr tarixli qərarına əsasən  7 noyabr -şənbə günündən  23 noyabradək ölkənin 10 şəhər və rayonunda epidemioloji vəziyyətin pisləşməsi şəraitində İqtisadiyyat Nazirliyi sahibkarlara maliyyə yardımı göstərəcək. İqtisadiyyat Nazirliyinin məlumatında deyilir ki, Lənkəran və Şəki şəhərlərində, həmçinin Cəlilabad, Biləsuvar, Qax, Zaqatala, Masallı, İsmayıllı, Quba, Xaçmaz rayonlarında muzdlu işçilərin əməkhaqqına müvafiq ödənişlər olacaq.

Bundan əlavə, həmin şəhər və rayonlarda fəaliyyət göstərən fərdi sahibkarlar (mikrosahibkarlar) birdəfəlik maliyyə dəstəyi alacaqlar.

İqtisadiyyat Nazirliyinin məlumatına görə, maliyyə yardımı 1,9 min işçiyə, həmçinin 13 min fərdi sahibkara göstəriləcək. Bununla yanaşı, nazirlik dəqiqləşdirir ki, son dörd ayda işçilərin sayını əhəmiyyətli dərəcədə azaltmayan vergiödəyicilərinə maliyyə dəstəyi göstəriləcək.

Ümumilikdə, 26 oktyabr 2020- ci il tarixinə olan vəziyyətə görə,  Azərbaycanda ilk və ikinci maliyyə yardımı paketi çərçivəsində vergiödəyicilərinin bank hesablarına əməkdaşların əməkhaqqının bir hissəsinin ödənilməsi üçün 204,6 mln. manat, fərdi sahibkarlara birdəfəlik maliyyə dəstəyinin göstərilməsi üçün 77 mln. manat köçürülüb.—0--