Hüquq müdafiəçisi: “Bəxtiyar Hacıyev siyasi məhbusdur”

Bakı/10.12.22/Turan: "Bəxtiyar Hacıyevə qarşı irəli sürülən ittihamlar saxta və siyasi motivlidir. Bəxtiyar Hacıyev siyasi məhbusdur, - “Müdafiə xətti” hüquq- müdafiə təşkilatının həmtəsisçisi Rüfət Səfərov Turan-a bildirib.

Onun fikrincə, Hacıyevin “xuliqanlıq” və “məhkəməyə hörmətsizlikdə” ittiham olunmasının hüquqi əsası yoxdur.

O əmindir ki, hakimiyyət Hacıyevi siyasi fəaliyyətilə əlaqədar təqib edir və onun həbsinə dair göstəriş “hakimiyyətin  zirvəsi”ndən gəlir.

Səfərovun fikrincə, Hacıyevin həbsi onun son vaxtlar bir sıra mötəbər beynəlxalq forumlarda iştirakı ilə bağlıdır, o, Azərbaycanda insan haqlarının pozulmasını tənqid edib və müxalifətyönlü adamlara qarşı repressiyalarda iştirak edən məmurlara  sanksiyaların tətbiqinə çağırıb.

“Bununla əlaqədar Bəxtiyar Hacıyevi təcrid etmək istəyirlər”, - Səfərov deyib və məhkəmə zamanı fəalın öz sözlərinə istinad edərək qeyd edib ki, yaxın vaxtlarda Hacıyevin ABŞ-a səfəri planlaşdırılıb.

Səfərov Hacıyevin taleyindən narahat olduğunu bildirib.

“Ona qarşı sanksiyaların tətbiq olunmayacağına zəmanət yoxdur. Əgər azadlıqda ikən oğurlanıbsa, gör, həbsdə olarkən necə rəftar edəcəklər”, - Səfərov deyib.

O, Hacıyevin ona qarşı irəli sürülən maddə üzrə həbsdə saxlanmasının qanunsuz olduğunu vurğulayıb.

Belə ki, Cinayət Prosessual Məcəlləsinə əsasən, təqsirləndirilən şəxsi 2 ildən artıq müddətə azadlıqdan məhrumetmə cəzası gözləyirsə, məhkəmə həbs qətimkan tədbiri seçə bilər.

Hacıyevə irəli sürülən ittihamlar - 221.1 (xuliqanlıq) və 289.1 (məhkəməyə hörmətsizlik) maddələri müvafiq olaraq 1 ilə və 6 aya qədər azadlıqdan məhrumetmə cəzasını nəzərdə tutur.

Lakin Milli Məclisin İnsan hüquqları komitəsinin üzvü Fazil Mustafa Hacıyevin işində “siyasi məqamlar” görmür.

“Birinci dəfə deyil ki, bu şəxs kimlərəsə qarşı belə hərəkətlər edir. Bunu siyasi motivlərə bağlamaq düzgün deyil. Adamlar hər hansı bir şəkildə öz hərəkətlərinə, davranışlarına nəzarət edə bilmirlərsə sonra bunu dərhal siyasi məhbus kimi təqdim etmək olmaz", - Mustafa deyib.

Onun sözlərinə görə Azərbaycanda normal şəkildə fəaliyyət göstərən blogerlər və fəallar var. Onları nə həbs etmirlər, nə də hər hansı problemlər yaşanmır.

Hacıyev dekabrın 9-da diffamasiya ilə bağlı qarşılıqlı ittihamlar üzrə məhkəmə çəkişməsində olduğu jurnalist Ülviyyə Alovlunun şikayəti əsasında açılan iş üzrə saxlanılıb.

Alovlu ilə münaqişə öz pişiklərinin balalarını paylaşmadıqları üçün yaranmış mübahisədən sonra başlayıb. Məişət mübahisəsi qarşılıqlı ittihamlar və məhkəmə çəkişmələrilə nəticələnib.

Bəxtiyar Hacıyev dəfələrlə bildirib ki, hakimiyyət tənqidlərə görə qisas almaq üçün bu faktdan istifadə edib.

Bəxtiyar Hacıyev hakimiyyətin siyasətinin qatı tənqidçisi kimi tanınır. O, dəfələrlə saxlanılıb, repressiyalara məruz qalıb.

Bu ilin avqustunda  hüquqlarının pozulmasına görə Azərbaycan vətəndaşlığından imtina etməsilə bağlı Prezident Administrasiyasına ərizə yazıb.—21b06-