ABŞ-ın Ukraynaya hərbi yardımı 20 milyard dollara çatıb

Vaşinqton/10.12.22/Turan: Cümə günü Ağ Ev Ukraynaya daha 275 milyon dollarlıq silah tədarükünü elan edib. Nəticədə Bayden administrasiyası dövründə Kiyevə ayrılan hərbi yardımın həcmi təxminən 20 milyard dollara çatıb, Turan-ın Vaşinqton müxbiri bildirib.

Son paketə HIMARS sistemləri üçün döyüş sursatları, 80 000 ədəd 155 millimetrlik artilleriya mərmisi, pilotsuz uçuş aparatları, hava hücumundan müdafiə vasitələri, yüksək mobil zirehli transportyorlar, təcili yardım maşınları və tibbi avadanlıqlar, 150 generator və digər səhra avadanlıqları daxildir.

"Bu yardım paketi Ukraynaya hava hücumundan müdafiəni möhkəmləndirmək üçün yeni imkanlar verəcək", - Pentaqon bildirib.

Sonuncu  tranş Rusiyanın Ukraynaya qarşı istifadə üçün İrandan partlayıcılı pilotsuz təyyarələr alması və bunların ölkənin enerji infrastrukturuna, eləcə də yaşayış evlərini və mülki şəxsləri hədəf alması ilə bağlıdır.

Ağ Ev Moskva və Tehran arasında hərbi əlaqələrin dərinləşməsini nəzərə alaraq  cümə günü xəbərdarlıq edib ki, Rusiya və İran birgə silah istehsalı üçün zəmin yaradırlar.

Milli Təhlükəsizlik Şurasının nümayəndəsi Con Kirbi mətbuat brifinqində bildirib ki, Moskva və Tehran “Rusiyada pilotsuz döyüş təyyarələrinin birgə istehsalı imkanlarını nəzərdən keçirirlər”. 0