Hüquq-mühafizə orqanları: Bu qətl qisas zəminində törədilib

Bakı/31.07.17/Turan: Baş Prokurorluq və Daxili İşlər Nazirliyi Hacıqabulda törədilən kütləvi qətl hadisəsilə bağlı birgə məlumat yayıblar.

Birgə məlumatda deyilir ki, iyulun 31-də səhər Hacıqabul şəhər sakinləri Nazim, Gülbadam, Bibilər və Namiq Qənbərovlar yaşadıqları evdə odlu silahla qətlə yetiriliblər. Ailənin digər üzvü Məmməd Qənbərov ağır bədən xəsarətləri ilə xəstəxanaya yerləşdirilib.

Hadisəni törədən Mübariz Mehdiyev adlı şəxs sonra odlu silahdan özünə atəş açaraq intihar edib.

Məlumatda rayon hüquq-mühafizə orqanlarının cinayətlə bağlı maddi sübutları topladığı, zəruri prosessual hərəkətləri yerinə yetirdikləri bildirilir.

Faktla bağlı Hacıqabul Rayon Prokurorluğunda Cinayət Məcəlləsinin 120.2.4 (xüsusi amansızlıqla və ya ümumi təhlükəli üsulla qəsdən adam öldürmə), 120.2.7 (iki və ya daha çox şəxsi qəsdən öldürmə), 29, 120.2.4 (xüsusi amansızlıqla və ya ümumi təhlükəli üsulla qəsdən adam öldürməyə cəhd), 29, 120.2.7 (iki və ya daha çox şəxsi qəsdən öldürməyə cəhd) və 228.1-ci (qanunsuz olaraq odlu silah əldə etmə, saxlama və daşıma) maddələri ilə cinayət işi başlanıb, iş üzrə müvafiq ekspertizalar təyin edilib.

İlkin araşdırmalarla müəyyən edilib ki, əvvəllər məhkum olunmuş M.Mehdiyev şəxsi münasibətlər zəminində M.Qənbərovdan qisas almaq niyyətilə onun yaşadığı evə gəlib. O, qoşalüləli ov tüfəngindən M.Qənbərova və onun ailə üzvlərinə, sonra isə özünə atəş açıb.

Hazırda cinayət işi üzrə zəruri istintaq və əməliyyat-axtarış tədbirləri davam etdirilir.-05D-