Hüquqşünas: "Bu, faktiki olaraq, əxlaq polisinin yaradılması deməkdir"

Bakı/02.09.19/Turan: Azərbaycan qanunvericiliyində ictimai mənəviyyat əleyhinə və milli mentalitetə zidd olan hallar nəzərdə tutulmayıb və ona görə onlara qarşı mübarizənin necə aparılması aydın deyil.

Bunu Turan-a hüquqşünas Samirə Ağayeva sentyabrın 2-si Bakı Şəhər Baş Polis İdarəsinin mətbuat xidmətinin rəisi Elşad Hacıyevin Bakı Şəhər Baş Polis İdarəsinin rəhbərliyi tərəfindən təsdiq olunan Tədbirlər Planına müvafiq olaraq, polisin səlahiyyətləri çərçivəsində konkret vəzifələr müəyyən olunaraq icraya yönəldilməsi barədə açıqlamaya münasibət bildirərək deyib.

Hüquqşünas vurğulayıb ki, bu, faktiki olaraq, bəzi ölkələrdə fəaliyyət göstərən əxlaq polisinin yaradılması deməkdir.

O, həmçinin bildirib ki, qeyd edilmiş "əxlaq" meyarları barədə ictimaiyyətə açıqlama verilməlidir. "Həmin əxlaq normalarına nəyin daxil olduğu və onların pozulmasının hansı meyarlarla müəyyən ediləcəyi bilinmir. Bu, qısa paltar olacaq, yoxsa əl-ələ tutma?"

Xatırladaq ki, sentyabrın 2-də Bakı Şəhər Baş Polis İdarəsinin mətbuat xidmətinin rəisi Elşad Hacıyev bildirib ki, paytaxt sakinlərindən daxil olan müraciətlərin, müşahidə olunan sosial-neqativ halların təhlilləri göstərir ki, Bakıda fəaliyyət göstərən bəzi əyləncə-istirahət yerlərində, gecə klublarında, barlarda, otellərdə və mərkəzi küçələrdə ictimai mənəviyyat əleyhinə, əxlaqa zidd hallar var.

Onun sözlərinə görə, əsasən Səbail rayonu ərazisində yerləşən "Fəvvarələr meydanı" və Nizami küçəsində, Nəsimi rayonu S.Vurğun, Nizami küçələrinin kəsişmələrində yüngül əxlaqlı həyat tərzi sürən şəxslərin profilaktikasına dair tərkibi əməliyyat, təhqiqat, ictimai təhlükəsizlik əməkdaşlarından ibarət fasiləsiz fəaliyyət göstərən xüsusi naryad qrupları yaradılıb. -0-