İctimai fəalların şəxsi həyatına müdaxilə ilə bağlı hüquq mühafizə orqanları araşdırma aparır

Bakı/14.03.21/Turan: “İctimai fəalların şəxsi həyatına müdaxilə ilə bağlı müraciətləri üzrə hüquq mühafizə orqanları tərəfindən müfaviq işlər aparılır.”

Bunu Turan-a Azərbaycan Prezidentinin köməkçisi Hikmət Hacıyev ictimai fəallar Nərmin Şahmarzadənin və Bəxtiyar Hacıyevin şəxsi yazışmaları adı ilə yayılmış mesajlarla bağlı onların hüquq mühafizə orqanlarına müraciətinə münasibət olaraq bildirib.

“Bununla bağlı hüquq mühafizə orqanlarına müraciət olunub. Hüquq mühafizə orqanları tərəfindən də aidiyyatı üzrə müvafiq işlər aparılır.” Hikmət Hacıyev belə deyib.

Xatırladaq ki, Beynəlxalq Qadınlar Günündə Bakıda bir qrup aktivist qadının “8 Marş – Haqlarımız uğrunda” yürüşündən 1 gün sonra fəallardan biri Nərmin Şahmarzadənin facebook profili ələ keçirilərək adı dəyişdirilib. Həmin profildən Gülnarə Mehdiyeva, Bəxtiyar Hacıyev və digər aktivistlərlə mesajlaşmaları adı ilə bəzi yazışmalar yayıldı. İctimai fəal Nərmin Şahmarzadə şəxsi həyatına müdaxilə ilə əlaqədar Daxili İşlər Nazirliyi və Dövlət Təhlükəsizliyi Xidmətinin rəhbərliyinə müraciət edib.

“Aksiyadan sonra profilim ələ keçirilib, polislə və hakimiyyətlə bağlı tənqidlər, video görüntülər silinib. Daha sonra "messencer"dən götürülən özəl həyatımla bağlı yazışmalar saxtalaşdırılıb: onların məzmununa, tarixinə əl gəzdirib yayırlar. Həmçinin, yayılan yazışmada qeyd olunmuş telefon nömrəmin də yayılması nəticəsində telefonuma çoxlu təhqiramiz, hədə-qorxu dolu mesajlar, ard-arda zənglər gəlir”, deyə fəalın bəyanatında deyilirdi.

Nərmin Şahmarzadə ilə yazışmalarda adı keçən ictimai fəal Bəxtiyar Hacıyev də adı çəkilən idarələri şəxsi həyatına müdaxilə və onun haqqında yalan məlumatlar yayılması faktını araşdırmağa çağırıb. O, Ombudsman Səbinə Əliyeva ilə də görüşüb və obyektiv araşdırılma aparılmasına yardım etməyi xahiş edib.—0—