İki AXCP fəalı saxlanılıb

Bakı/16.07.20/Turan: İyulun 14-də Azərbaycan Ordusunu müdafiə məqsədi ilə keçirilən aksiyadan sonra Azərbaycan Xalq Cəbhəsi Partiyasının (AXCP) üzvü, - partiyanın Nəsimi rayon təşkilatının fəalı Fərid Əsədov və Qaradağ rayon təşkilatının fəalı Elvin Məmmədov polis tərəfindən saxlanılıb. Bu barədə AXCP-nin məlumatında deyilir.

“Hazırda Fərid Əsədov Sabunçu rayon Polis İdarəsinin 13 saylı Polis Bölməsində, Elvin Məmmədov isə Nizami rayon Polis İdarəsinin 23-cü Polis Bölməsində saxlanılır. Onlar Azərbaycan Ordusunu müdafiə məqədi keçirilən aksiyada sakit tərzdə iştirak edib və Milli Məclisin binasına daxil olanlar arasında olmayıblar”, deyə AXCP bildirir.

AXCP sədrinin müavini hər iki fəalın saxlanılmasını qanunsuz və yolverilməz hesab edir.

“Onların saxlanılması qanunsuzdur və siyasi baxımdam düzgün deyil. Hökumət və siyasi sistem hazırda diqqətini siyasi mübarizəyə deyil, döyüş cəbhəsinə yönəltməlidir”, deyə Seymur Həzi qeyd edib.

Onun sözlərinə görə, AXCP üzvlərinin təqibi İ.Əliyevin dünən polisdən müxalifətçilər arasındakı “satqınları” cəzalandırmağı tələb etdiyi bəyanatı ilə bağlıdır. -03B-