İki turizm firmasının rəhbərləri COVİD-19 testinə dair saxta sənədlərin verilməsində ittiham olunurlar

Bakı/30.07.21./Turan: Baş prokuror yanında Korrupsiyaya Qarşı Mübarizə Baş İdarəsində "ƏSR" və "ARKAN TOUR" məhdud məsuliyyətli cəmiyyətlərin vəzifəli şəxslərinin qanunsuz hərəkətlərilə bağlı cinayət işi açılıb.

Baş Prokurorluğun məlumatında deyilir ki, "ƏSR" məhdud məsuliyyətli cəmiyyətin direktoru Əsgər Bayramovun, "ARKAN TOUR" məhdud məsuliyyətli cəmiyyətin direktoru Tünzalə Əliyevanın və digər şəxslərin əlbirliyi nəticəsində 101 nəfər Gəncədən Sankt-Peterburqa getmək üçün müvafiq tibbi müayinə olmadan COVİD-19 testinə dair saxta sənədlər əldə edib.

Cinayət sövdələşməsinin ümumi məbləği 12 min 120 manat (7 min dollardan çox) təşkil edib.

Bayramova və Əliyevaya qarşı Cinayət Məcəlləsinin 308.2 (vəzifə səlahiyyətlərindən sui-istifadə ağır nəticələrə səbəb olduqda), 320.1 (rəsmi sənədlərin qanunsuz hazırlanması və satışı) və 320.2-ci (bilə-bilə saxta sənədlərdən istifadə) maddələri ilə ittiham irəli sürülüb.

Məhkəmənin qərarı ilə Bayramov həbs olunub. Fakt üzrə əməliyyat-istintaq tədbirləri davam etdirilir.—06D-