![Açıq mənbələrdən foto](https://turan.az/resized/media/2018/main/072600012012-750-500-resize.webp)
Açıq mənbələrdən foto
Bakı/26.07.18/Turan: Vəkillər Kollegiyası Rəyasət Heyəti daha iki vəkili cəzalandırıb. Vəkillərdən birinin fəaliyyəti bir illiyə dayandırılıb, digərinin kollegiya üzvlüyünə xitam verilməsi üçün məhkəməyə müraciət edilməsinə qərar verilib.
Bu haqda Vəkillər Kollegiyasının məlumatında bildirilir.
Qərarlar kollegiyanın Rəyasət Heyətinin iyulun 25-də keçirilmiş iclasında qəbul edilib. Məlumata görə, cəzalandırılan vəkillər Qəhrəman Pirməmmədov və Nurəli Həsənovdur.
Rəyasət Heyətinin ümumilikdə vəkillər barəsində başlanılmış 10 intizam icraatına baxdığı bildirilir. Yekunda vəkil etikası normalarının pozuntusu əsası ilə 2 vəkilə töhmət verildiyi, digər işlər üzrə isə pozuntu aşkar edilmədiyi üçün intizam icraatlarına xitam verildiyi qeyd edilir.
Cəzalandırılan vəkillərin mövqeyini öyrənmək mümkün olmayıb. Vəkillər kollegiyası onlar barəsində verilmiş qərarların səbəbləri haqda detallı bilgi vermir.
Vəkillər Kollegiyasında son yeddi ayda xeyli vəkilin fəaliyyəti dayandırılıb. Onların arasında Yalçın İmanov, Əsabəli Mustafayev, Nemət Kərimli, Fəxrəddin Mehdiyev və digərləri var. Yalçın İmanov istisna olmaqla, digərlərinə bir illik məhdudiyyət tətbiq olunub.
Buna qədər isə Aslan İsmayılov, Xalid Bağırov, Əlayif Həsənov, Namizəd Səfərov, Müzəffər Baxışovun vəkillik fəaliyyətinə xitam verilib.
Bu yaxınlarda vəkil İradə Cavadova cəzalandırılıb. Ən son vəkil Fuad Agayevə töhmət verilib.
Vəkillər barəsində cəza qərarları əsasən, hüquq-mühafizə qurumlarının - Daxili İşlər Nazirliyi orqanlarının, Ədliyyə Nazirliyinin Penitensiar Xidmətinin və Baş Prokurorluğun müraciətləri əsasında verilib.
Vəkillər bu tendensiyanı daha çox yerli və beynəlxalq hüquq müdafiəçilərinin siyasi məhbus saydığı şəxsləri müdafiə etmələri ilə əlaqələndirir. Vəkillər Kollegiyası bu iddiaları rədd edir.
Rəsmi Bakı ölkədə ümumiyyətlə siyasi məhbus olmadığını bəyan edir.-0---
Cəmiyyət
-
Bazar günü, iyulun 28-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir.
-
Bakı şəhəri ərazisində qanunsuz miqrasiyaya qarşı mübarizə çərçivəsində müxtəlif ünvanlarda əməliyyat tədbirləri həyata keçirilib. Daxili İşlər Nazirliyindən verilən məlumata görə, Baş Dövlət Yol Polisi İdarəsinin qanunsuz miqrasiyaya qarşı mübarizə idarəsinin əməkdaşları tərəfindən Azərbaycan ərazisində yaşamaq və qalmaq hüququ verən sənədləri olmayan 34 əcnəbi müəyyən edilərək saxlanılıb.
-
Azərbaycan Müdafiə Nazirliyi (AMN) iyulun 25-də bəyanat yayaraq son günlərdə Ermənistanı Kəlbəcərdə ağır silahlar, Tovuz istiqamətində isə kvadrokopter tətbiq etməklə ona qarşı “təxribatlar törətməkdə” günahlandırıb. Üstəlik, Ermənistanın Qərb ölkələri ilə hərbi əməkdaşlığından narazılıq və narahatlıq ifadə edib.
-
Daxili İşlər Nazirliyinin Baş Narkotiklərlə Mübarizə İdarəsinin son əməliyyatları zamanı narkotik maddələrin qanunsuz dövriyyəsilə məşğul olan mütəşəkkil dəstənin 5 üzvü - əvvəllər məhkum olunmuş Bəhlul İsmayılov, Röyal Əliyev, Xəyal Alıyev, Samir Ağayev və Əli Məmmədli saxlanılıblar.
Rəy yaz