İlqar Məmmədov: Demokratik dəyərlər hələ ki, qazdan daha güclüdür

Bakı/18.06.18/Turan: "İyunun 12-də TANAP qaz kəmərinin açılış mərasimində səkkiz ölkədən dördünün - Azərbaycan, Serbiya, Türkiyə və Ukraynanın təmsil olunması məni təəəcübləndirmir".

Bu barədə 2 saylı Cəzaçəkmə Müəssisəsində cəza çəkən ReAL Partiyasının sədri İlqar Məmmədov TANAP qaz kəmərinin açılışına münasibət bildirib.

REAL Partiyasının həbsdəki lideri İlqar Məmmədov TANAP qaz kəmərinin açılışı ilə bağlı açıqlamasında belə yazıb. Onun açıqlamasını REAL hərəkatı yayıb.

İ.Məmmədov ismarıcında onunla bağlı Avropa Məhkəməsi qərarının icrası məsələsini də yada salıb, paralellər aparıb.

"Keçən il dekabr 5-də mənim işimlə bağlı Avropa Şurası Nazirlər Komitəsi (AŞ NK) rəsmi olaraq hakimiyyətə qarşı xüsusi icraata başladə, Konvensiyanın yatmış 46.4 maddəsini ilk dəfə tətbiq etdi. 47 ölkədən 39-u bu qərarın lehinə səs verdi, 8 ölkə isə bu qərarı dəstəkləmədi. Bu səkkiz ölkədən dördünün (Azərbaycan, Serbiya, Türkiyə və Ukrayna) 12 iyun tarixində TANAP qaz kəmərinin açılış mərasimində ən yüksək, yəni prezidentlər səviyyəsində təmsil olunması məni təəccübləndirmir. Mərasim zamanı beşinci ölkənin, Gürcüstanın da bayrağı asılmışdı, amma rəsmi Tbilisinin ora kimi göndərməsini mənə buradan, yəni həbsxanadan bilmək çətindir", İ.Məmmədov qeyd edib.

O, həmçinin qeyd edib ki, Rusiya nümayişkaranə şəkildə TANAP-ın da bir hissəsi olduğu Cənub Qaz Dəhlizinə neytral mövqe nümayiş etdirir.

İlqar Məmmədov Cənub Qaz Dəhlizinin Rusiya əleyhinə layihə olmadığını vurğulayıb.

"Azərbaycanın sülalə hakimiyəti CQD-ni "anti-Rusiya layihəsi" olmadığı halda, onu bu marka altında Avropa və ABŞ-a satmağa çalışaraq, əvəzində respublikaçılıq dəyərlərinə sadiq müxalifəti ölkə daxilində darmadağın etmək üçün Ceyms Bond lisenziyası almaq istəyir.

Lakin demokratik dəyərlər hələ ki, qazdan daha güclüdür. 39 ölkə bu lisenziyanın verilməsindən imtina etdi", REAL lideri yazıb.

TANAP layihəsi Xəzər Dənizinin Azərbaycan sektorundakı "Şahdəniz-2" yatağından və Xəzər Dənizinin digər sahələrindən hasil edilən təbii qazın Türkiyəyə və Avropaya nəqlini nəzərdə tutur.

TANAP layihəsində ARDNŞ 80 faiz, Türkiyənin BOTAŞ və TPAO şirkətləri isə birlikdə 20 faiz paya malikdir. Layihə üzrə saziş 2012-ci il iyunun 26-da İstanbulda imzalanıb.

İ.Məmmədov 2013-cü ilin yanvarında İsmayıllıda kütləvi iğtişaşların təşkilində ittiham olunaraq, 7 il azadlıqdan məhrum edilib.

AİHM hələ 2014-cü ilin mayında İ.Məmmədovun azadlıq hüququ və təqsirsizlik prezumpsiyasının pozulmasını tanıyıb. Ancaq o, hələ də azadlığa buraxılmayıb.

Ötən il dekabrın 5-də Avropa Şurası Nazirlər Komitəsi (AŞNK) AİHM-in İ.Məmmədovla bağlı qərarının nəzərə alınmamasına görə Azərbaycana qarşı xüsusi prosedura başlanması barədə keçid qətnaməsi qəbul edib.

Bundan sonra, AİHM-in AŞNK-a, Azərbaycan hökumətinə və həbsdə olan İ.Məmmədova məktub göndərdiyi açıqlanıb. Onda məsələ ilə bağlı tərəflərə bu il martın 1-nə kimi öz yekun rəylərini çatdırmaqdan ötrü vaxt verildiyi bildirilirdi.--0--