Bakı/07.09.19/Turan: Şənbə günü demokratik ictimaiyyət, mətbuat nümayəndələrinin və gənc fəalların iştirakı ilə Azərbaycanın məşhur hüquqşünas və hüquq müdafiəçisisi, keçmiş "vicdan məhbusu" İntiqam Əliyevin "Əclafın ölümü" adı yeni romanının təqdimatı keçirilib.
Müəllifin və bir qrup fəalın təşəbbüsü ilə təqdimat çərçivəsində uzaq rayonlarda yaşayan aztəminatlı ailələrin övladları üçün məktəb ləvazimatlarının toplanması aksiyası da keçirilib. Həmçinin, siyasi məhbus ailələrinin övladlarına yardım göstərilməsi nəzərdə tutulur.
"Əclafın ölümü" romanının baş qəhrəmanı hakimiyyətin basqılarına məruz qalan medianı, jurnalistləri, ictimai-siyasi fəalları müdafiə edən az sayda mübariz vəkillərdən biridir. O, ölkəni idarə edənlərin ünvanına tez-tez sərt tənqidlər səsləndirir. Vəkilin özünü həbsə atırlar. Öz ölkəsində və xaricdə onun müdafiəsi üçün kampaniyalar təşkil olunur, ən nüfuzlu mükafatlara layiq görülür, öz ölkəsindən çox-çox uzaqlarda da mübarizə simvollarından birinə çevrilir.
Beşillik həbs həyatından sonra, nəhayət, azadlığa buraxılır və daha böyük enerji ilə mübarizəyə atılır. Bu dəfə tam fərqli cəbhədə - vaxtilə çiyin-çiyinə dayandığı, keçmiş əqidə yoldaşlarına qarşı...
İntiqam Əliyev qeyd edib ki, onun qəhrəmanının, daha doğrusu əks-qəhrəmanının prototipi konkret bir insan deyil, bütünlükdə siyasi sistemdir.
Opponentlərini sıradan çıxarmaq üçün ixtiyar sahiblərinin hər vasitəni məqbul saydığı ölkədə sistem daim əclaf istehsalı ilə məşğuldur, deyə müəllif qeyd edib.
Kitabın əsas sloqanı kimi onun "əclaflar barədə deyil, onları yetirən sistem barədə olduğu" vurğulanır.
Roman tanınmış vəkil, 2015-ci ildə ağır xəstəlikdən vaxtsız dünyasını dəyişmiş Elton Quliyevin xatirəsinə ithaf olunub.
"Elton Quliyev və İsaxan Aşurovun - məşhur vəkillərin, gözəl insanların ölümü bizim vaxtsız və yeri doldurulmayan itkilərimizdir", deyə İntiqam Əliyev bildirib.
Tədbir iştirakçılarının çıxışlarında qeyd edilib ki, "Əclafın ölümü" İntiqam Əliyevin ilk bədii əsəri - "Meydan" kimi ölkənin ədəbi həyatında mühüm hadisə, müasir Azərbaycan siyasi roman janrının inkişafına töhfədir.
Oxucunun ölkədə baş verən proseslərin mahiyyətini başa düşməsi və onları narahat edən suallara cavab tapması üçün Azərbaycanın siyasi reallıqları haqqında yeni əsərlərin yaradılmasının əhəmiyyəti qeyd edilib.
Təqdimat iştirakçılarına İntiqam Əliyevin kitabının nüsxələri hədiyyə olunub. -06D-
Cəmiyyət
-
Bakıda keçirilən COP29 konfransı mübahisələr və tənqidlərin kölgəsində başa çatdı. Tanınmış tarixçi Cəmil Həsənli bu tədbiri Prezident İlham Əliyevin rəhbərliyi altında Azərbaycanın idarəçilik problemlərinin parlaq əks olunması kimi xarakterizə etdi. Administrasiyanın qatı tənqidçisi olan Həsənli, COP29-u bahalı bir tamaşa adlandıraraq sistemli çatışmazlıqları üzə çıxardığını və Azərbaycanın siyasi və iqtisadi strukturlarına beynəlxalq diqqəti artırdığını vurğuladı.
-
Avropa Parlamenti Prezidenti Roberta Metsola azərbaycanlı iqtisadçı və siyasi məhbus, professor Qubad İbadoğlunu 2024-cü il Saxarov Mükafatı təqdimetmə mərasimində iştirak etmək üçün Strasburqa dəvət edib. Dəvət məktubu COP29 iqlim konfransı zamanı Avropa Parlamenti üzvü Maykl Bloss tərəfindən çatdırılıb. Lakin İbadoğlu hazırda ev dustaqlığında olduğu və Azərbaycandan çıxmasına qadağa qoyulduğu üçün dəvəti qəbul edə bilmir.
-
İstanbul Hava Limanında həyata keçirilən bir əməliyyat, diplomatik münasibətlərdə sarsıntı yarada biləcək bir hadisəni üzə çıxardı. Azərbaycan hərbi attaşesi olduğu iddia edilən Kəhrəman Şamil oğlu Məmmədov, 70 kiloqram qızıl ilə saxlanıldı. Türkiyə KİV-in məlumatına görə, Məmmədovun diplomat olması ilə bağlı açıqlamalarına baxmayaraq, hadisənin qızıl qaçaqmalçılığı ilə bağlı olduğu güman edilir.
-
Sərin bir noyabr axşamı, Bakının sakinləri Xəzər dənizinin sahilində toplaşaraq, sahilə vurulmuş nəhəng bir balinanın bədənini heyrətlə izlədilər. 16 metr uzunluğunda olan bu məxluqun cansız görünən forması və kəskin qoxusu bir çoxlarına ekoloji faciənin şahidi olduqlarını düşündürdü. Lakin bu gecə sirli qonaq artıq yox idi – yük platformasına yüklənərək hava limanına aparılmışdı.
Rəy yaz