İşçi Qrupun yeni siyahısında 127 siyasi məhbus var

Bakı/20.02.19/Turan: Siyasi məhbusların vahid siyahısının tərtib edilməsi üzrə İşçi Qrup onların yenilənmiş siyahısını dərc edib.

Əldə edilmiş sənədlər, məhkəmə prosesləsinin və sorğuların monitorinqləri əsasında İşçi Qrupu ölkədə bu gün siyasi motivlərlə həbs edilmiş 127 şəxs olduğunu təsdiq edib.

54 nəfərin adı monitorinq altında olanların siyahısına salınıb, 1 nəfər isə monitorinqdən çıxarılaraq siyasi məhbus kimi tanınıb.

İşçi Qrup 3 iyul 2018-ci ildə Gəncə İcra Hakimiyyəti başçısına qarşı sui qəsd, daha sonra 10 iyulda Gəncədə iki polis əməkdaşının öldürüldüyü hadisə ilə bağlı həbs edilən 51 nəfəri aşağıdakı səbəblərdən monitorinq altında olanların siyahısına əlavə edir: Dövlət orqanları həbs edilənlərin təqsirsizlik prezumpsiyasını pozub; həbs edilənlərin ailə üzvlərinə 9 gün heç bir məlumat verilməyib; hadisələrin mütəşəkkil dəstə tərəfindən törədildiyi iddia olunsa da, bununla bağlı sübutlar ortaya qoyulmayıb; dövlət orqanları 10 iyulda baş verən hadisənin iğtişaş olduğunu iddia etsə də, bu video çəkiliş və ya hər hansı başqa sübutla təsdiq edilməyib; hüquq mühafizə orqanlarının keçirdiyi əməliyyatlar zamanı aşırı gücdən istifadə olunub, nəticədə 6 nəfər ölüb; məhkəmə prosesləri rəsmi olaraq açıq olsa da, faktiki olaraq yarı-qapalı keçirilir, jurnalistlərin məhkəmədə iştirakı üçün akkreditasiya tələb edilir, məhkəmə prosesi zamanı qeyd aparmağa icazə verilmir, prosesdə iştirak edən jurnalistlərin müəyyən edilib hakim tərəfindən məhkəmə zalından çıxarılması halları müşahidə edilib.

127 siyasi məhbus aşağıdakı kateqoriyalar üzrə təsnif edilib.

- 9-u jurnalistlər və blogerlər (Nicat Əliyev, Araz Quliyev, Rəşad Ramazanov, Seymur Həzi, Fikrət Fərəməzoğlu, Elçin İsmayıllı, Mehman Hüseynov, Əfqan Muxtarlı, Ziya Əsədli),

- 1-i şair (Tofiq Həsənli),

- 1-i hüquq müdafiəçisi (Əliabbas Rüstəmov),

- 18-si siyasi və ictimai fəallar (İlkin Rüstəmzadə, Asif Yusifli, Fuad Qəhrəmanlı, Qiyas İbrahimov, Bayram Məmmədov, Elgiz Qəhrəman, Fuad Əhmədli, Gözəl Bayramlı, Əlikram Xurşudov, Orxan Baxışlı, Mirfeyzulla Seyidov, Saleh Rüstəmov, Vidadi Rüstəmli, Aqil Məhərrəmov, Babək Həsənov, Ruslan Nəsirov, Azad Həsənov, Əbülfəz Sadıqov),

- 67-si inanclı fəallar (Elxan Bünyadov, Lətif Əhmədov, Anar Əliyev, Sahil Rzayev, Niftəli Vəliyev, Taleh Bağırzadə, Fərhad Balayev, Cabbar Cabbarov, Rasim Cəbrayılov, İbrahim Xudaverdiyev, Aqil İsmayılov, Etibar İsmayılov, Abbas Quliyev, Əli Nuriyev, Abbas Tağızadə, Əlibaba Vəliyev, Ramin Yarıyev, Abbas Hüseynov, Əbülfəz Bünyadov, Cahad Babakişizadə, Bəhruz Əskərov, Zakir Mustafayev, Şamil Abduləliyev, Ağa-əli Yəhyayev, Elçin Qasımov, Elgün Axundov, Vüsal Alış, Nahid Qəhrəmanov, Əlibəy Şahbazov, Əmirəli Əliyev, Fərhad Muradov, Ramil Əliyev, Seyfəddin Şirvanov, İsa İbrahimov, Seymur Aslanov, Elxan İsgəndərov, Zülfüqar Mikayılov, Ruzi İsmayılov, Cabir Əliyev, Ramil Seyfullayev, Mübariz İbrahimov, Elman Ağayev, Əli Hüseynov, Eldar Bünyatov, Mehman Quliyev, Mehman Məmmədov, Elxan Həsənov, Məhəmmədəli Axundzadə, Faiq Allahverdiyev, Əhsən Nuruzadə, Sahib Həbibov, Əliəsgər Cabbarov, Rza Ağali, Ziya Tahirov, Xalid Kazımov, Elvin Nəsirov, Ceyhun Səfərli, Elimxan Hüseynov, Qorxmaz Camalov, Dəyanət Səmədov, Firdovsi Məmmədrzayev, Mövsüm Səmədov, Rufulla Axundzadə, Fəramiz Abbasov, Abgül Süleymanov, Elnur Cavadov, Sərdar Babayev),

- 3-ü ömürlük həbs olunma cəzasına məhkum olunmuşlar (Keçmiş Xüsusi Təyinatlı Polis Dəstəsinin üzvləri Elçin Əmiraslanov, Arif Kazımov və Səfa Poladov),

- 14-ü sosial etirazlarla bağlı tutulanlar (onlardan 1-i 2013-cü il İsmayıllı, 3-ü 2015-ci il Mingəçevir, 10-u 2016-cı il Siyəzən etirazlarına görə tutulanlardır: Vasif İbrahimov, İlqar Xəlilov, Dilqəm Mahmudzadə, İlkin Abdullayev, Talıb Ağamaliyev, Kamran Abdullayev, Nizami Qəniyev, Zaur Şəkərov, Abasət Süleymanov, Müslüm Əzimov, Coşqun Bəğişov, Fariz Kərimov, Namiq Məstanov, Elçin Əliyev),

- 2-si keçmiş dövlət məmurları (Əli İnsanov və Rüfət Səfərov),

- 4-ü siyasi girovlar (Elnur Seyidov, Mübariz Abdullayev, Murad Ədilov, Emin Saqiyev),

- 8-i Səid Dadaşbəyli və onunla birgə tutulanlardır (Rəşad Əliyev, Fərid Ağayev, Səid Dadaşbəyli, Ceyhun Əliyev, Cahangir Kərimov, Samir Qocayev, Rasim Kərimov, Bəybala Quliyev).

İşçi Qrupun 1 sentyabr 2018-ci ildə təqdim etdiyi sonuncu hesabatdan sonra siyahıda adları olan 4 nəfər azadlığa buraxılıb. Onlardan 2 nəfər (Mikayıl İdrisov, Emil Möhbalıyev) cəzasının müddəti bitdiyi üçün, 2 nəfər (Məmməd İbrahim və Telman Şirəliyev) məhkəmə qərarları ilə azad edilib. 3 nəfər yeni şəxsi (Azad Həsənov, Emin Saqiyev, Əbülfəz Sadıqov) İşçi Qrup siyasi məhbus kimi tanıyaraq əsas siyahıya əlavə edib.

İQ hesab edir ki, Azərbaycanda siyasi məhbusların sayı daha çoxdur. Repressiv mühit çoxlarını onların işləri haqqında məlumat yaymamağa məcbur edir.

İşçi Qrupa 10 vətəndaş cəmiyyəti fəalı, o cümlədən hüquq müdafiəçiləri İntiqam Əliyev, Anar Məmmədli, araşdırmaçı jurnalist Xədicə İsmayılova və başqaları daxildir. -06D-