İstintaq və prokurorluq orqanları Oqtay Gülalıyevin vəkilinə hələ də cavab verməyiblər

Bakı/19.08.20/Turan: Hüquq müdafiəçisi Oqtay Gülalıyevin vəkili Fuad Ağayev 2019-cu ilin sonlarından etibarən istintaq və prokurorluq orqanlarına dəfələrlə müraciət etməsinə baxmayaraq, indiyədək müraciətlərinə cavab almayıb, baxmayaraq ki, adı çəkilən orqanlar ən qısa müddətdə ona vəsatətlərinə və şikayətlərinə baxışın nəticələri haqqında məlumat verməli idilər.

Vəkil F.Ağayeyin Turan-ın müxbirinə verdiyi məlumata görə, o, hələ 2019-cu ilin noyabrında iş üzrə obyektiv araşdırma üçün zəruri hesab etdiyi bir sıra sənədlərin və materialların tələb edilməsi haqqında vəsatət verib. Heç bir cavab almayan Ağayev Bakının Nəsimi rayonunun o vaxtki prokuroru S.Məmmədlinin adına şikayət göndərib. Lakin bu dəfə də cavab gəlməyib. Nəhayət, yeni baş prokuror K.Əliyev gəldikdən sonra F.Ağayev onun adına şikayətlə müraciət edib.

Bundan sonra F.Ağayev və Gülalıyevin ailəsinin maraqlarını təmsil edən Turan İnformasiya Agentliyinin direktoru Mehman Əliyev iyulun 14-də Nəsimi rayonunun yeni təyin edilmiş prokuroru Həsən Hənifəyev tərəfindən qəbul edilib.

Görüşdə Gülalıyevin nümayəndələrinə istintaqın gedişatı və prokurorluğun son hərəkətləri haqqında məlumat verilib. Xüsusən, istintaq orqanına - Nəsimi Rayon Polis İdarəsinin İstintaq şöbəsinə Gülalıyevin nümayəndəsinin vəsatətində yer alan tələblərin əksəriyyətinin təmin edilməsi göstərişi verilib.

Prokuror istintaqın hadisənin tam mənzərəsinin ortaya çıxarılmasında və işin ədalətli araşdırılmasında maraqlı olduğuna inandırıb.

İstintaq çərçivəsində prokuror Gülalıyevin işini aparan əməkdaşlara bundan sonra da zərərçəkmişin nümayəndələri ilə sıx əlaqəni təmin etməyi tapşırıb. Bununla belə, ay yarım keçməsinə baxmayaraq, vəkil hələ də vəsatətlərinə rəsmi cavab almayıb.

Xatırladaq ki, Oqtay Gülalıyevi 2019-cu il oktyabrın 29-da Bakının mərkəzində piyada keçidində avtomobil vurub. O, xəstəxanaya aparılıb, amma yalnız oktyabrın 31-də Respublika Neyrocərrahiyyə Xəstəxanasının həkimləri tərəfindən özəl klinikada əməliyyat olunub.

Noyabrın 5-də o, Heydər Əliyev Fondunun dəstəyi ilə İstanbula "Avrasiya" klinikasına göndərilib, noyabrın 20-dən etibarən isə "Amerika kıinikası"nda müalicəsi davam etdirilir. O, 2019-cu il oktyabrın 29-dan etibarən koma vəziyyətindədir. -06B-