İtkin düşən hərbçilərin valideynləri Dövlət Təhlükəsizliyi Xidmətinin qarşısında aksiya keçiriblər

Bakı/09.04.21/Turan: İkinci Qarabağ Müharibəsi zamanı itkin düşmüş bir qrup hərbçinin valideynləri aprelin 9-da Dövlət Təhlükəsizliyi Xidmətinin binası qarşısında  aksiya keçiriblər. Valideynlər Dövlət Təhlükəsizliyi Xidmətinin rəisi Əli Nağıyevin onları qəbul etməsini istəyiblər.

“Ötən dəfə qəbuldan sonra iki nəfər itkin hərbçinin nəşi tapılıb ailəsinə verildi. Ümid edirik ki, bu dəfə qəbuldan sonra da axtarış sahəsində bir irəliləyiş olar”,-  valideynlərdən biri deyib.

Digər valideyn isə bildirib ki, 7 aydır övladlarından xəbər yoxdur.

“Axtarış yaxşı təşkil edilmir. Bizim övladlarımız yalnız döyüş gedən ərazilərdə deyil, Ermənistanda da axtarılmalıdır. Biz etiraz edirik, dövlət qurumları qəbul edir, amma bir nəticəsi yoxdur. Çünki axtarış işləri hərtərəfli təşkil edilməyib”,  - o deyib.

Valideynlər həmçinin prezident İlham Əliyevin onları qəbul  etməsini istəyirlər.

Dünən,valideynlər Prezident Adminisrasiyanın qarşısında etiraz etdikdən sonra baş prokuror Kamran Əliyev onların qarşısına çıxıb və valideynləri qəbul edib.

Valideynlərin əksəriyyəti  övladlarının Ermənistan tərəfdə əsirlikdə olduğunu güman edir.

Müdafiə Nazirliynin məlumatına görə, İkinci Qarabaş Müharibəsində 64 nəfər itkin düşüb. Onlardan bir neçəsinin nəşi son aylarda tapılaraq ailələrinə təhvil verilib.03-