Jurnalist barədə araşdırmanın davam etdiyi deyilir

Bakı/31.10.20/Turan: Jurnalist Nurlan Qəhrəmanlı (Nurlan Liberi) oktyabrın 30-da Daxilİ Işlər Nazirliyinə dəvət edilib, Daxili Təhqiqat İdarəsində izahat verib. Bu barədə Turana N.Qəhrəmanlı özü bildirib.

Onun deməsinə görə, DİN-ə çağırılmasına səbəb bir şəxsin ondan şikayətçi olmasıdır və həmin şəxs də izahat verib.

Amma N.Qəhrəmanlı deyir ki, buna qədər oktyabrın 29-da  saat 15 radələrində  20 Yanvar ərazisində mülki geyimli üç nəfər şəxs onu zorla maşına mindirərək Mütəşəkkil Cinayətkarlığa qarşı Mübarizə İdarəsinə (MCQMİ) gətiriblər. N.Qəhərəmanlı idarədə fiziki təzyiqlərə məruz qaldığını iddia edib.

Onun sözlərinə görə, idarədə dövləti cinayətdə ittihama məruz qoyulub,

“Orada özünü şöbə rəisi adlandıran şəxs məni yarım saat dizim üstə saxladı, fiziki təzyiq etdi. Məni erməni xüsusi xidmət orqanlarına, həmçinin Azərbaycan Dövlət Təhlükəsizlik Xidmətinə işləməkdə (iki tərəfli agentlikdə) ittiham etdi. Onun sözlərinə görə mən cəbhədən Ermənistana videogörüntülər ötürmüşəm. Telefonuma müdaxilə edildi, parolu zorla açdırıldı, (düşünürəm ki, şantaj məqsədilə mənim şəxsi fotoşəkillərimi və videogörüntülərimi internetdə yayacaqlar Azərbaycanda belə hallar dəfələrlə baş verib )”, deyə N.Qəhrəmanlı bildirir.

Jurnalistin sözlərinə görə, idarədə deyilib ki, 102 xidmətinə vətəndaş şikayəti əsasında saxlanılmışdır. N.Qəhrəmanlı deyir ki, sözügedən şikayət üç ay əvvəl edilib, quramadır, çünki, qarşı tərəfin izahatı belə alınmamışdı.

Jurnalist idarədə zorla üzristəmə videosu çəkdirildiyini, həm də idarənin  bu məsələni ictimailəşdirməməsini tələb etdiyini bildirib, axşam saat 20 radələrində sərbəst buraxılıb. O, hesab edir ki, tənqidçi jurnalist fəaliyyətinə görə, müharibəni bəhanə gətirərək susdurmaq istəyirlər.

Daxili İşlər Nazirliyi mətbuat xidmətinin rəhbəri Ehsan Zahidov N.Qəhrəmanlnın MCQMİ-yə dəvət  edilməsilə bağlı “Turan”a deyib ki, Daxili İşlər Naziriyinin 102 xidmətinə zəng edən  şəxs Nurlan adlı sosial şəbəkə istifadəçisinin dövlətin, ordunun əleyhinə paylaşımlar etdiyini, bu adamla bağlı araşdırma apaırlmasını istədiyini bildirib: “Bununla bağlı oktyabrın 29-da Nurlan MCQMİ-yə dəvət edilib. Orada onun öz razılığı ilə videogörüntülü izahatı alınıb. Ondan sonra sərbəst buraxılıb. Bu dövlətin təhlükəsilziyi ilə bağlı məsələdir deyə dəvət edilib, görüntülü izahatı alınıb. Özünə də izah edilib ki, nəyə görə, dəvət edilib.Hal hazırda araşdırmalar davam edir. Nurlanın MCQMİ-də fiziki təzyirlərə məruz qalması ilə bağlı dedikləri isə əsassızdır”, deyə E.Zahidov bildirib. --0--