Açiq mənbələrdən foto.
Bakı/18.07.20/Turan: İyulun 15-nə keçən gecə Milli Məclisin qarşısında hadisələrin çəkilişini apararkən saxlanılmış jurnalistlər Anar Abdullayev və Firudin Səlimov cümə günü axşam polis bölməsindən sərbəst buraxılıblar. Bu barədə Turan-a onlar özləri bildiriblər.
Jurnalistlər bölmələrdə 60 saatdan çox saxlanılıblar.
Onlar bildiriblər ki, əvvəlcə parlament binasının qarşısından Səbail rayon polis idarəsinin 9 saylı polis bölməsinə, oradan isə Binəqədi rayon 4 saylı polis bölməsinə aparılıblar.
Orada 9 kv. metrlik otaqda 6 nəfər saxlanılıb.
Cümə günü jurnalistlər Baş Prokurorluğun Ağır Cinayətlərə dair İşlər üzrə İstintaq İdarəsinə aparılıblar, sonra bölməyə qaytarılıblar. Sonra isə sərbəst buraxıblar.
Jurnalistlər polis bölməsində saxlanılma şəraitindən şikayət verməyi planlaşdırırlar.
Cümə günü axşam AXCP fəalı Mətanət Mahmarzayeva (Turan) da sərbəst buraxılıb. O, iyulun 16-da parlamentin qarşısında orduya dəstək aksiyasında iştirak etdiyinə görə saxlanılıb. Fəal iyulun 15-də gecə parlamentin ətrafında baş verən hadisələrlə bağlı açılmış cinayət işi çərçivəsində dindirilib.
Mahmarzayeva məlumat yaymamaq haqqında iltizam verdiyinə istinad edərək, ətraflı şərh verməkdən imtina edib.
Fəal Elvin Cəbizadə də sərbəst buraxılıb. O, parlamentin qarşısında keçirilən aksiyada iştirak etməyib. Cəbizadə iyulun 15-də səhərə yaxın şəhərdə orduya dəstək aksiyalarının çəkilişini aparan həyat yoldaşı, jurnalist Aysel Ümidovanı götürmək üçün gəldikdə bulvar yaxınlığında saxlanılıb.
"Məni Hilton otelinin yanında saxlayıblar, bildiriblər ki, bölməyə getməliyik, çünki Milli Məclisə kimsə girib, polis maşınını aşırıb və araşdırma aparılacaq, araşdırmadan sonra sərbəst buraxılacayıq. Əvvəl elə bilirdilər ki, iğtişaşları biz törətmişik, getdikcə isə məlum olurdu ki, heç bir günahımız yoxdur. Amma hər şey aydın olduğuna baxmayaraq bizi azadlığa buraxmırdılar. Bizdən yaşayış yerini tərk etməməklə bağlı iltizam aldılar", deyə Cəbizadə bildirib.
O qeyd edib ki, saxlanma şəraitinin pis olmasına baxmayaraq, onunla normal rəftar ediblər. " Yaxşı rəftar edirdilər, amma yatmağa yer yox idi. Şərait demək olar ki, yox idi", deyə Cəbizadə qeyd edib. -06D-
Cəmiyyət
-
Azərbaycanın Rəqəmsal İnkişaf və Nəqliyyat Nazirliyi faktiki olaraq təsdiqləyib ki, Prezident İlham Əliyevin rəsmi təyyarəsi “Bakı-1” 25 dekabr tarixində Müstəqil Dövlətlər Birliyinin (MDB) qeyri-rəsmi sammitində iştirak etmək üçün Sankt-Peterburqa uçuş zamanı xarici texniki müdaxiləyə məruz qalıb. Bu açıqlama, hadisənin detalları və Rusiya hava məkanında GPS siqnalının itirilməsi ilə bağlı xəbərlər fonunda diqqət mərkəzinə düşüb.
-
Yardımlı rayonunun İranla sərhədində 20 kiloqram narkotik vasitə və psixotrop maddə aşkarlanıb. Bu barədə Daxili İşlər Nazirliyinin mətbuat xidmətinin Lənkəran regional qrupu bildirib.
-
Fevralın 6-da Bakıda və Abşeron yarımadasında günün birinci yarısında bəzi yerlərdə çiskinli yağış yağacaq. Arabir güclənən şimal-qərb küləyi əsəcək.
-
Azərbaycanda yaxın günlərdə temperaturun kəskin enməsi və ölkə ərazisində fırtınalı, yağıntılı hava şəraitinin müşahidə olunacağı gözlənilir. Milli Hidrometeorologiya Xidməti bazar ertəsi bildirib ki, bəzi ərazilərdə intensiv yağıntılar, dağlıq və dağətəyi rayonlarda qar yağışı, yolların buz bağlaması və güclü külək proqnozlaşdırılır.
Rəy yaz