Bakı/21.10.19/Turan: Bazar ertəsi Bakı Ağır Cinayətlər Məhkəməsində "Kaspi" liseyində 564 min manatın mənimsənilməsi haqqında iş üzrə prosesdə tərəflərin yekun çıxışları olub.
İş üzrə təqsirləndirilənlər liseyin iki mühasibi - Tural Məmmədov və Fərahim Möhbalıyevdir. Onlar liseyin təsisçisi, Azərbaycan prezidentinin köməkçisi Əli Həsənovun həyat yoldaşı Sona Vəliyevanın şikayəti əsasında saxlanılıblar və CM-in 179.4-cü maddəsi (böyük ölçüdə məninsəmə) ilə ittiham olunublar.
Proses boyunca təqsirləndirilən şəxslər Sona Vəliyevanın məhkəməyə çağırılmasında israr ediblər, amma bu tələb təmin edilməyib. Hakim məhkəmə istintaqının başa çatdığını elan etdikdə isə hər iki təqsirləndirilən şəxs qeyri-obyektiv təhqiqata etiraz əlaməti olaraq aclıq elan edib.
Oktyabrın 18-də prokuror məhkəmədən Məmmədovun və Möhbalıyevin 6 il şərti azadlıqdan məhrumetmə cəzasına məhkum edilməsini istəyib.
Bugünki iclasda lisey nümayəndəsi prokurorun çıxışı ilə razı olmadığını bildirib. Onun sözlərinə görə, müttəhimlərin təqsiri sübuta yetirilib və onlara CM-in şərti cəza nəzərdə tutan 60 və 70-ci maddələri tətbiq edilə bilməz.
Amma Möhbalıyevin vəkili Adəm Məmmədov müvəkkilinin təqsirsiz olduğunu bildirib. Onun sözlərinə görə, məhkəmədə heç bir etibarlı dəlil təqdim edilməyib. Möhbalıyev heç bir sənəd imzalamayıb, valideynlərdən alınan pulu isə baş mühasib Tural Məmmədov şəxsən liseyin təsisçisi Sona Vəliyevaya verirdi.
Bu zaman vəkil Vəliyeva və Məmmədov arasındakı hesablaşmalar kitabının məhkəmə tərəfindən tədqiq edilmədiyini qeyd edib.
"Müvəkkilim iki yaxın qohum - Sona Vəliyeva və Tural Məmmədov arasında münaqişənin qurbanı olub", deyə vəkil bildirib. O, liseyin maliyyə işlərindəki qarışıqlığı, rəsmi kassirin belə olmadığını, onun funksiyasını Vəliyevanın özünün yerinə yetirdiyini qeyd edib.
Vəkil Möhbalıyevə bəraət verməyi xahiş edib. Möhbalıyev özü də təqsirsiz olduğunu bildirib və özünə və Məmmədova bəraət verilməsini istəyib.
İkinci mühasib deyib ki, mənimsəməkdə ittiham olunduğu məbləğin bir hissəsindən öz biznesi üçün istifadə edib və artıq pulun müəyyən hissəsini qaytarıb. "Mən qalan məbləği qaytarmağa söz vermişdim və qaytarmağa hazır idim. Amma Sona Vəliyeva bütün məbləğdən istifadə etdiyimi etiraf etsəm, polisə şikayət etməyəcəyinə söz verərək, məni aldadıb", deyən Məmmədov əlavə edib ki, Möhbalıyevin məsələ ilə ümumiyyətlə əlaqəsi yoxdur. Hökmün oktyabrın 22-də oxunacağı gözlənilir. -06D-
Cəmiyyət
-
Bakıda keçirilən COP29 konfransı mübahisələr və tənqidlərin kölgəsində başa çatdı. Tanınmış tarixçi Cəmil Həsənli bu tədbiri Prezident İlham Əliyevin rəhbərliyi altında Azərbaycanın idarəçilik problemlərinin parlaq əks olunması kimi xarakterizə etdi. Administrasiyanın qatı tənqidçisi olan Həsənli, COP29-u bahalı bir tamaşa adlandıraraq sistemli çatışmazlıqları üzə çıxardığını və Azərbaycanın siyasi və iqtisadi strukturlarına beynəlxalq diqqəti artırdığını vurğuladı.
-
Avropa Parlamenti Prezidenti Roberta Metsola azərbaycanlı iqtisadçı və siyasi məhbus, professor Qubad İbadoğlunu 2024-cü il Saxarov Mükafatı təqdimetmə mərasimində iştirak etmək üçün Strasburqa dəvət edib. Dəvət məktubu COP29 iqlim konfransı zamanı Avropa Parlamenti üzvü Maykl Bloss tərəfindən çatdırılıb. Lakin İbadoğlu hazırda ev dustaqlığında olduğu və Azərbaycandan çıxmasına qadağa qoyulduğu üçün dəvəti qəbul edə bilmir.
-
İstanbul Hava Limanında həyata keçirilən bir əməliyyat, diplomatik münasibətlərdə sarsıntı yarada biləcək bir hadisəni üzə çıxardı. Azərbaycan hərbi attaşesi olduğu iddia edilən Kəhrəman Şamil oğlu Məmmədov, 70 kiloqram qızıl ilə saxlanıldı. Türkiyə KİV-in məlumatına görə, Məmmədovun diplomat olması ilə bağlı açıqlamalarına baxmayaraq, hadisənin qızıl qaçaqmalçılığı ilə bağlı olduğu güman edilir.
-
Sərin bir noyabr axşamı, Bakının sakinləri Xəzər dənizinin sahilində toplaşaraq, sahilə vurulmuş nəhəng bir balinanın bədənini heyrətlə izlədilər. 16 metr uzunluğunda olan bu məxluqun cansız görünən forması və kəskin qoxusu bir çoxlarına ekoloji faciənin şahidi olduqlarını düşündürdü. Lakin bu gecə sirli qonaq artıq yox idi – yük platformasına yüklənərək hava limanına aparılmışdı.
Rəy yaz