"Kaspi" liseyinin mühasibləri şərti cəza aldılar

Bakı/22.10.19/Turan: Çərşənbə axşamı Bakı Ağır Cinayətlər Məhkəməsində "Kaspi" liseyində 564 min manatın mənimsənilməsində ittiham olunan mühasiblər Tural Məmmədov və Fərahim Möhbalıyev barəsində hökm oxunub.

Məhkəmə onları üç il dövlət orqanlarında vəzifə tutmaq qadağan olunmaqla, müvafiq olaraq 6 və 5 il müddətinə şərti azadlıqdan məhrumetmə cəzasına məhkum edib.

Onlar cəza müddəti ərzində azadlıqda, amma probasiya xidmətinin nəzarəti altında qalacaqlar.

Xatırladaq ki, mühasiblər liseyin təsisçisi, prezidentin köməkçisi Əli Həsənovun həyat yoldaşı Sona Vəliyevanın şikayəti əsasında həbs olunublar və CM-in 179.4-cü (böyük ölçüdə məninsəmə) maddəsi ilə ittiham olunublar.

Proses boyunca təqsirləndirilən şəxslər Sona Vəliyevanın məhkəməyə çağırılmasında israr ediblər, amma bu tələb təmin edilməyib. Hakim məhkəmə istintaqının başa çatdığını elan etdikdə isə hər iki təqsirləndirilən şəxs qeyri-obyektiv təhqiqata etiraz əlaməti olaraq aclıq elan edib.

Oktyabrın 18-də prokuror məhkəmədən Məmmədovun və Möhbalıyevin 6 il şərti azadlıqdan məhrumetmə cəzasına məhkum edilməsini istəyib.

Möhbalıyev özünü təqsirli bilməyib, Məmmədov isə qismən təqsirini etiraf edib.

Müdafiə tərəfi müttəhimləri bu işin mülki təhqiqat predmeti olmasını, Möhbalıyevin isə ümumiyyətlə baş mühasib və liseyin təsisçisi arasındakı maliyyə münasibətləri ilə əlaqəsi olmamasını əsas götürərək, müttəhimlərə bəraət verilməsini xahiş edib. -06D-