Lənkəranda gözəllik salonundan külli miqdarda narkotik vasitə və saxta pul çıxdı 

Bakı/03.02.23/ Turan: Lənkəran Şəhər Rayon Polis Şöbəsinin (ŞRPŞ) əməkdaşlarının keçirdikləri əməliyyat tədbirləri nəticəsində dövriyyədən külli miqdarda narkotik vasitə çıxarılıb. Bununla bağlı Daxili İşlər Nazirliyinin Mətbuat Xidməti məlumat yayıb.

Əməliyyat tədbirləri nətiçəsində şübhəli şəxs qismində Lənkəran rayon sakinləri İsmayıl Hüseynli və tanışı İlahə Məmmədova saxlanılıb.

Bu şəxslərdən 9 kiloqram 224 qram heroin, 2 kiloqram 330 qram metamfetamin olmaqla, ümumilikdə 12 kiloqrama yaxın narkotik vasitə aşkarlanaraq götürülb. Bundan əlavə, 23 ədəd saxta 100 ABŞ dolları əsginazları müsadirə edilib.

Məlumata görə, İ.Məmmədova həmin narkotik vasitə və saxta əsginazları özünün işlətdiyi, Lənkəran şəhəri ərazisində yerləşən gözəllik salonunda gizlədib.

Aparılan araşdırmalarla məlum olub ki, həmin şəxslər narkotik vasitəni və saxta əsginazları şəxsiyyəti istintaqla araşdırılan "Əfşin" adlı İran vətəndaşından satışını təşkil etmək məqsədi ilə əldə ediblər.

Məlumatda deyilir ki, ümumilikdə isə Lənkəran ŞRPŞ-nin əməkdaşlarının yanvar ayı ərzində keçirdikləri əməliyyat tədbirləri nəticəsində narkotiklərin qanunsuz dövriyyəsində şübhəli bilinən 44 nəfər saxlanılıb. Onlardan 29 kiloqram narkotik vasitə, o cümlədən 23 kiloqram heroin, 3,5 kiloqram marixuana və 2,5 kiloqram metamfetamin aşkarlanaraq götürülüb. Faktlarla bağlı araşdırmalar aparılır. 05D