Lənkəranda saxlanılan fəallar sərbəst buraxılıb

Bakı/02.02.21/Turan: Dünən, fevralın 1-də Lənkəran Dövlət Universitetinin qarşısında saxlanılan Tələbə Güc Mərkəzinin üzvü Əhməd Məmmədli, Celil Zabidov, Orxan İsgəndərli, Samir Axundzadə sərbəst buraxıldı.

Bu barədə Turana Əhməd Məmmədli özü məlumat verib. 

Onun sözlərinə görə saxlanılan gənclər Lənkəran Rayon Məhkəməsinin qərarı ilə azadlığa buraxılıb. "Biz dünən saxlanılanda bizim barəmizdə karantin qaydaların pozulması ilə bağlı protokol tərtib olunub, deyilib ki, biz sosial məsafəni pozmuşuq. Bu isə tamamilə qanunsuz idi, çünki biz üç nəfər idik və sosial məsafə kifayət qədər çox idi. Cəlil Zabidov isə bu gün saxlanıldı. Biz bu gün bunu məhkəmədə də bildirdik. Hakim bizim sözlərimizi nəzərə alaraq bizə bəraət verdi".

Ə.Məmmədli qeyd edib ki, dünən saxlanılandan sonra onlar Lənkəran Rayon Polis şöbəsinə gətirildi. "Orada gecə saat 23:30-a qədər bizi sorğu-suala tutdular. Dedilər, siz müxalifətçisiniz, haradan maliyyələşirsiniz və sair. Bu gün günorta saatlarından sonra isə məhkəməyə gətirildik". 

Fevralın 2-də Lənkəran rayonunda (Bakıdan 272 kilometr cənub) saxlanılan reportyor Nurlan Libre və ictimai fəal Rüstəm İsmayılbəyli də sərbəst buraxılıb.

Onların fevralı 1-də saxlandılan fəalların məsələsini aydınlaşdırmaq üçün Lənkəran rayonuna getmişdilər.

“Bu gün səhər Lənkəranda polis əməkdaşları Rüstəm İsmayılbəyli və mənim kimliyimi müəyyənləşdimək bəhanəsi ilə Lənkəran Şəhər Polis Şöbəsinə gətirdilər. Orada 5 saata yaxın bir müddətdə qaldıq. İndi ikimizi də Bakıya yola salırlar,” – Libre  facebook səhifəsində qeyd edib.-0-