Mariupoldan olan azərbaycanlı ailənin faciəsi

Bakı/18.04.22/Turan:  Rusiya qoşunlarının mühasirəyə aldığı Mariupolda xilas olan Ukrayna vətəndaşı Lalə Babayeva “Amerikanın səsi”nin Azərbaycan xidmətinə müsahibəsində yaşadığı dəhşətlərdən və evakuasiyadan danışıb.

O 14 il ailəsilə birlikdə Mariupolda yaşayıb. Aprelin 11-də iki uşağı ilə birlikdə Azərbaycana gəlib. Buna qədərsə bir aydan çox müddətdə ailə zirzəmidə gizlənib.

Bir gün Mariupoldan çıxıb Berdyanska gedə biliblər, amma orada da bombardmana düşüblər və Mariupola qayıtmağa məcbur olublar. İkinci dəfə Odesaya gedib. “Odessa Azərbaycanlıları Birliyi" diaspor təşkilatı ailənin Ukraynadan çıxaraq Bakıya getməsinə kömək edib.

Babayeva Mariupolda ağır humanitar fəlakətdən danışıb.

“Yemək yoxdur, hər yer bağlıdır, adamlar acdır. Su, işıq, qaz yoxdur. Uşaqlarım bombaların gurultusundan az qala kar olacaqdılar. Biz böyük stress keçirmişik, şəhərdə çox sayda ölənləri gördük”, - Babayeva deyib.

Bəzən bombalar adamların gizləndikləri zirzəmiləri də dağıdır. Bir anın içində onlar kül olur.

Babayeva deyib ki, müharibə başlayanda onun həyat yoldaşı Polşada işləyirmiş. O, iki uşağı ilə zirzəmiyə düşüb və demək olar ki, heç vaxt bayıra çıxmayıblar. Çox soyuq olub.

“Bayıra çıxıb, ocaq qalayıb yemək bişirirdik. Uşaqlara yeməyin, suyun olmadığını izah etmək çətindir. Özümüz yemirdik, suyu uşaqlara qurtum-qurtum verirdik. Adamlar bacardıqları qədər özlərini xilas edirdilər. Bibimin oğlu bombanın altında qaldı, tikələrini belə yığmaq mümkün olmadı”, - Babayeva deyib.

Onun sözlərinə görə, adamlar istənilən istiqamətdə şəhəri tərk etməyə çalışırdılar. Bir kiçik avtomobilə 9 nəfər sığdıq. 4 böyük, 5 uşaq. Heç nə götürməmişdik, ancaq bir su və uşaqlar üçün iki tikə çörək götürmüşdük”, - o deyə.

Onun sözlərinə görə, Azərbaycanda heç kim onlara kömək etmir. Üstəlik, Bakı aeroportunda koronavirus testinə görə onlara qarşı kobudluq ediblər.

Hazırda Babayeva uşaqları ilə birlikdə bacısıgildə kirayədə yaşayır və Lənkərana anasının yanına getmək fikrindədir.

“Burada müalicə alırıq, amma gələn həftə Lənkərana gedəcəyik. Bizə kömək olsaydı, uşaqlarım məktəbə gedərdilər. Amma bizə heç bir köməklik göstərmirlər”, - Babayeva bildirib.—03B06-