Martın 11-də Rusiya rəqəmsal zülmətə qərq ola bilər

Bakı/08.03.22/Turan: Martın 7-də Amerikanın MarketRebellion maliyyə şirkəti bildirib ki, Ukraynaya qarşı təcavüzə görə cəza kimi martın 11-də Rusiyanın ümumdünya İnternetlə əlaqəsi kəsiləcək. Şirkət onu da dəqiqləşdirib ki, bu tarixdən sonra yalnız Rusiyada serverləri olan saytlar rusiyalılar üçün əlçatan olacaq.

Amerika şirkətinin məlumatını heç kim yoxlamayıb və dövlət qurumlarından heç bir təsdiq olmayıb. Bununla belə, qarşıda gözlənilən boykot xəbərləri bütün dünya KİV-də yayılıb.

Dolayısı ilə məlumatın doğruluğunu Rusiya dövlət təşkilatı - Rəqəmsal İnkişaf Nazirliyi təsdiqləyib. Qurum rusiyalı istifadəçilərdən martın 11-dək Rusiyanın domen adlar sistemindən istifadəyə keçməyi, xarici hostinq, sayta daxil olma sayğaclarından imtina etməyi və “parol siyasətini” möhkəmləndirməyi xahiş edib.

"Rusiya saytlarına xaricdən fasiləsiz kiberhücumlar həyata keçirilir. Biz Rusiya resurslarının əlçatanlığını təmin etmək üçün müxtəlif ssenarilərə hazırlaşırıq. İnterneti içəridən kəsmək planlaşdırılmır", - Rusiya Federasiyasının Rəqəmsal Nazirliyindən bildiriblər.

Rusiya rəqəmsal zülmətə qərq olacaq, Rusiyada qadağan olunmuş "Dojd" "Roskomsvoboda"dan ekspertin rəyini dərc edib.

Texniki baxımdan bölünmüş ötürmənin bütün nöqtələrini söndürmək mümkündür və bütün bununla hər şey bitəcək, Rusiyada qlobal İnternet olmayacaq, - ekspert yazır.

"Bütün Rusiya iqtisadiyyatı qlobal şəbəkəyə bağlıdır, onun kəsilməsi hazırda tətbiq olunan və artıq iqtisadiyyata təsir edən sanksiyalardan daha pis zərbədir. İndi yeganə şey mümkün qədər çox sayda alət yükləməkdir. Onlar xarici aləmlə  ən azı bir kommunikasiya kanalı olduqda onlayn qalmağa kömək edəcək. Məsələn, siz Psiphon və ya Tor brauzeri kimi proqramlardan istifadə edə bilərsiniz. Amma təbii ki, əgər xarici aləmlə əlaqə tamamilə pozulubsa, o zaman ya göyərçinlərin köməyilə əlaqə saxlamaq, ya da qlobal İnternet şəbəkəsilə əlaqəsi olmayan başqa yollar axtarmaq lazım gələcək.

Mövcud durumda belə bir nəticənin olma ehtimalını inkar etmək olmaz... Vəziyyət daha da pisləşərsə, bizi böyük şatdaun və qlobal şəbəkədən ayrılma gözləyir. Əvvəlcə nə olacağı bəlli deyil: ya kənardan söndürüləcəyik, ya da içəridən kəsilmə olacaq. Biz hazırda xoşagəlməz duurmdayıq və çox şey vəziyyətin [Ukraynadakı] gələcəkdə necə cərəyan edəcəyindən asılıdır”, - ekspert “Dojd”a bildirib.

Əlavə edək ki, MarketRebellion-un məlumatına  görə, 2019-cu ilin martında Rusiya testlər keçirib və testlər zamanı dünyanın qalan hissəsilə əlaqə kəsilib, lakin öz vətəndaşları üçün İnterneti saxlayıb. Bunlar runetin "izolyasiyası " üzrə təlimlər olub. Hakimiyyət orqanları mobil rabitə abunəçilərinin təhlükəsizliyini, onların şəxsi məlumatlarının qorunmasını təmin etmək, həmçinin “ağıllı” cihazların zəif tərəflərini öyrənmək üçün bir neçə ssenari hazırlayıb.

Martın 11-də kəsilmə barədə məlumatdan sonra dərc olunan ekspert replikalarından görünür ki, üç il öncə keçirilmiş təlimlər Rusiyaya heç bir şey verməyib.—0—