Media-icmal 01.02.21

Maaş və pensiyalara yenidən baxılması təklifi, qaz sayğaclarının dəyişdirilməsinə münasibət, koronavirus infeksiyası əleyhinə peyvəndin vurulması səbəbləri, Yeni Balaxanıda gecələr küçələrin işıqlandırılmaması ilə bağlı qayğılar və s. məsələlər bugünki medianın mövzuları sırasındadır...   

"Yenisabah.az" saytı "Maaş və pensiyalara yenidən baxılacaq" sərlövhəli məqalədə bəhs olunan məsələnin səbələrini deputat Vahid Əhmədovla dəyərləndirir.

V.Əhmədovun sözlərinə görə, büdcədən maliyyələşən təşkilatlarda çalışanların əmək haqqına, həmçinin pensiyalara yenidən baxılmalıdır. Deputat buna səbəb kimi bu il yanvarın 4-də yanacağın bahalaşmasının ərzaq məhsullarının qiymətinə də təsir etdiyini gösətrib.

V.Əhmədov hesab edir ki, indiki bahalaşma fonunda maaş və pensiyalara yenidən baxılmalıdır, çünki bahalaşma çox sürətlə gedir: "Fevralın 1-də yaz sessiyası öz işinə başlayır, hesab edirəm ki, parlamentdə də bu məsələyə baxılacaq", deyə deputat bildirib.  

Deputata görə, benzin və dizelin bahalaşması fonunda bahalaşma gözlənilən idi, məhsulların daşınması zamanı nəqliyyat xərci onun qiymətinə təsir edaən amildir, ola bilməz ki, yanacaq bahalaşsın, amma mal-məhsul bahalaşmasın.

Deputat əlavə edir ki, bəzi məhsullar obyektiv səbəbdən bahalaşsa da, çoxu sui-istifadə nəticəsidə bahalaşıb. Hətta bəzi məhsullarda bahalaşma 1-2 manat həcmindədir və belə hallara nəzarət gücləndirilməlidir.

"Yeniavaz.com" saytı isə "Hansısa oliqarx-məmur gətirdiyi sayğaclarını sırımaq istəyir" sərlövhəli məqalədə fevralın 1-dən qaz sayğaclarının dəyişdirilməsini şərh edir.

İctimai fəallar yada salırlar ki, bir neçə il əvvəl ölkədə mexaniki qaz sayğaclarını elektron sayğaclarla əvəz etdilər, indi yenidən əvəzləmə başlayıb və bu dəfə elektron sayğacları mexaniki ilə əvəz edirlər.

Fəallar vurğulayırlar ki, burada məmur marağı var, maraqları olmasa bu "dəyiş-düyüş oyunu" olmazdı, bu sayğaclarla manipulyasiya edilir, yəni istifadə ediləndən də çox yazılır: "Bu növbəti fırıldaqdır və yenidən hansısa oliqarx-məmur gətirdiyi sayğacları sırımaq istəyir. Əgər belə deyildisə, onda istifadəyə yararlı sayğaclar niyə dəyişdirilir?!", deyə fəallar sual edirlər.

Fəallar deyir ki, bu "dəyiş-düyüş" oyunu milyonlarla insanın narahatçılığına səbəb olur və buna on milyonlarla pul sərf edilir.

Fəallara görə, qaz da keyfiyyətli verilmir, bir gündə bir neçə dəfə kəsilib açılması çoxsaylı insan faciəsinə səbəb olur, amma buna görə bir məmur belə görə məsuliyyətə cəlb edilməyib. Sayğacların dəyişdirilməsinə gəlincə, kimlərsə bilərəkdən, yaxud bilməyərəkdən insanları narazı salmaq üzərində var gücləri ilə çalışır.

"Trend/az" saytı isə  "Vaksini niyə vurdurmalıyıq? – ekspert açıqladı" sərlövhəli məqalədə verilən sualı cavablandırır.

Tibb üzrə fəlsəfə doktoru Yazgül Abdiyeva deyir ki, bir-iki ay əvvəllə müqayisədə Azərbaycanda virusa yoluxma azalıb, amma, bununla belə, karantin qaydalarının tələblərinə ciddi əməl olunmalı, həm də vaksinasiya mərhələli şəkildə davam etməlidir.

Y.Abdiyeva deyir ki, vaksinasiya uğurlu keçirilir, bu proses Azərbaycanda

könüllüdür, amma bu prosesə qeyri-ciddi yanaşmaq kimi başa düşülməməlidir. "Sağlamlığı imkan verən, əks göstərişləri olmayan hər bir kəs vaksinasiyada iştirak etməlidir. Çünki vaksinasiya ilk növbədə həmin şəxsin özünü yoluxmadan qoruyur", deyə əsas səbəbi göstərir.

Y.Abdiyeva əlavə edir ki, pandemiyadan qorunmaq üçün vaksin vurdurulmalıdır və bununla da hər 100 nəfərdən 91-92-i virusdan tam qorunacaq,

"Müsavat.com" saytı "Yeni Balaxanıda əcaib mənzərə: təzə işıq dirəkləri var, lampalar yanmır" sərlövhəli məqalədə qəsəbənin gecələr işıqlandırılmasındakı problemi diqqət mərkəzinə çəkir.

"Burada axşamlar əldə çıraqla gəzməyin də mənası yoxdur. Çünki istəyirsən, fənər yandır, istəyirsən, lampa tut, xeyri yoxdur, yenə göz-gözü görməyəcək. Yaydan bu yana bir əncam çəkmirlər, küçələr kor-koranə vəziyyətdə qalıb, bu gün - sabah məhəllədə ağır qəza baş versə, təəccüblənmərəm", deyə müəllif bildirir.

Müəllif vurğulayır ki, işıq dirəklərinin quraşdırılması məqsədi ilə Yeni Balaxanıda yolları qazıblar, çala-çuxura çeviriblər: "Hər 20 metrdən bir dirək qoyublar. Amma sakinlərin arzusu ürəklərində qalıb. Artıq 2021-ci ilin yanvarı bitir, indiyə qədər işıq dirəklərinin lampaları yanmır", deyə müəllif gerçək durumu anladır. 

Müəllifə görə, gecələr fəlakət yaşanır, insanlar az qalır ki, maşının altına yıxılsın, sürücülər də qaranlıqda kor olurlar, ya çuxura düşürlər, ya da qəza riski yaranır: "İntəhası, bizə deyilmir ki, nə üçün lampalar yanmır. Əgər xərc çəkib dirəklər quraşdırıblarsa, işə salsınlar da...", qəsəbə sakinləri belə deyirlər.