Media-icmal 01.10.20

“Azərbaycan” qəzeti “Qarabağdan ermənilərin böyük köçü başlayır” sərlövhəli məqalədə erməni əhalisinin  Qarabağdan köçünün başladığını bildirir. 

Müəllif vurğulayır ki, Azərbaycan ordusunun sentyabrın 27-dən başladığı əks-həmlə döyüş əməliyyatları Ermənistanın  onun qarşısında duruş gətirməsinin mümkün olmadığını göstərir.

“Son döyüşlər erməni tərəfinin çoxsaylı itkilərə məruz qalması, işğal altındakı müəyyən əraziləri tərk etməsi ilə nəticələnir. Əvvəllər ermənilər bu barədə çaşdırıcı məlumatlar yaysalar da  indi vəziyyətin ağırlığını etiraf edənlər də var. Hazırda Ermənistanın bəzi media orqanları hadisələrin gedişinin onların lehinə olmadığını etiraf etməkdən belə çəkinmirlər”, - müəllif vurğulayır.

Müəllif  Ermənistanın media mənbələrinə istinadən əhalinin Xankəndidən kütləvi və kortəbii şəkildə köçürülməsinin baş verdiyini bildirir: “Əhali digər təhlükəsiz yerlərə axın edir. Xankəndidən böyük köç başlayıb. Qarabağdakı rejim əhalinin evlərini tərk etməsinə maneələr yaratmır. Gedənlər postlarda saxlanılmır”.

Müəllifin deməsinə görə, erməni tərəfdə əsgərlərin fərariliyi artır, gənclər orduya getmək istəmirlər.

Yazı müəllifinin deməsinə görə, Ermənistan tərəfi cəbhədə davam edən hərbi əməliyyatlar fonunda daha Azərbaycan torpaqlarında qala bilməyəcəklərini başa düşərək şələ-külələrini yığışdıraraq oranı birdəfəlik tərk etməyə hazırlaşırlar.

Müəllif Rusiyanın “kadara.ru” İnternet resursuna istinadən erməni tərəfi çox böyük itkilərə məruz qaldığını, hospitalların yaralılarla dolu olduğunu bildirir.

Müəllifin deməsinə görə, Stepanakertə (Xankəndi-red.) dünyanın hər yerindən çoxsaylı könüllülər gəlir, bu, şişirtmə deyil”.

“Mətbuat.az” saytı İran Ermənistana kömək edir, təcili nota verilməlidir” sərlövhəli məqalədə İranın Ermənistana hərbi yük daşımalarında tranzit rolu oynamasını gündəmə gətirir.

“İran Rusiyadan Xəzər dənizi vasitəsilə gəmilərlə Ermənistana göndərilən hərbi texnika və silahların tranzit rolunu oynayır”. Bunu isə sayta politoloq Məhəmməd Əsədullazadə bildirib.

Siyasi ekspert İranın bu mövqeyini Azərbaycana qarşı qonşuluq siyasətinə, həmçinin rəsmi dini olan islam dəyərlərinə zidd sayır və bunu Tehranın birbaşa Ermənistanın yanında olması kimi dəyərləndirir.

Müəllif əlavə edir ki, İran yük maşınları açıq şəkildə Ermənistana silahlar daşıyır, amma, rəsmi Tehran bunu inkar edir, özü də bu yük daşınmalar iyuldan etibarən hava, quru vasitəsilə davam edir.

Politoloqa görə, İran Qarabağın işğaldan azad olunmasını regional təhlükəsizliyə təhdid hesab edir, İran güclü Azərbaycanı “Cənubi Azərbaycan” məsələsində İrana təhdid kimi görür, odur ki, Ermənistanın silahlandırılmasında rol alır.

“Hərbi yüklərin daşınmasının video və fotoları ortadadır. Azərbaycan İran səfirini XİN çağırıb nota verməlidir, Rəsmi Tehrandan ciddi izahat tələb olunmalıdır. Əks təqdirdə, Azərbaycan İrana qarşı sanksiyalara qoşulmalı, İrandan Rusiyaya ixrac olunan malların daşınmasının qarşısını almalıdır”.

Müəllif yada salır ki, Azərbaycan İranın müəyyən təhlükəsizlik maraqlarını diqqətə alıb ABŞ- İran siyasətində yer almadı.

Qeyd edək ki, son günlər sosial şəbəkələrdə İrandan Ermənistana hərbi texnikanın daşınması ilə bağlı görüntülər yer almaqdadır.

“Sfera.az” saytı “Tanınmış vəkil dustaqların azad edilərək cəbhəyə göndərilməsini  təklif  etdi” sərlövhəli məqalədə vəkil Anar Qasımlınin bəhs edilən mövzuda düşüncələrinə yer verilir.

Vəkil hesab edir ki, hərbi vəziyyət rejimində məhkəmələrdə mülki və kommersiya mübahisələrinə baxılması dayandırılmalıdır. 

Cinayət işlərinə baxılması sürətləndirilməli, mümkün olduğu həddə, bu gün düşmənə qan uddurmağa qadir olan, hansısa səhvinə görə cəza çəkən oğullarımız həbsdən azad edilməlidir. 

“Dövlətə qarşı törədilmiş cinayətlər, xüsusilə ağır cinayətlər istisna olmaqla, digər cinayət işləri üzrə alternativ cəzalar tətbiq olunmalı, iqtisadi cinayətlərə görə həbsdə olan xakerlərimiz azad edilməli və informasiya müharibəsinə cəlb olunmalıdır. Cəbhədə darmadağın olan düşməni informasiya müharibəsində də dağıtmalıyıq” deyə A.Qasımlı təklfini irəli sürür.

“Müsavat.com” saytı Azərbaycan Silalı Qüvvələri tərəfindən erməni tərəfin məhv edilən döyüş texnikası barədə statistikanı diqqətə çatdırır.

Müəllif ölkənin hərbi mənbələrinə istinadən bildirir ki, sentyabrın 27-i səhər saatlarından sentyabrın 30-u saat 21.30-dək düşmən canlı qüvvədə, hərbi və döyüş texnikasında xeyli itki verib və bütün cəbhə boyunca tutduqları mövqelərdən və ərazinin vacib sahələrindən geri çəkilməyə məcbur edilib.

Müdafiə Nazirliyindən Musavat.com-a verilən məlumata görə, bu müddətdə düşmənin ümumi itkisi aşağıdakı kimidir:

- 200-dək tank və digər zirehli texnika;

- 228 ədəd artilleriya, yaylım atəşli raket sistemləri, minaatan;

- 30 ədəd hava hücumundan müdafiə vasitələri;

- 6 komanda-idarəetmə və komanda-üşahidə məntəqəsi;

- 5 silah-sursat anbarı;

- 110-dan artıq avtomobil texnikası;

- 1 ədəd “S-300” zenit-raket kompleksi.

Bununla yanaşı müəllif  əlavə edir ki, sentyabrın 30-da Ağdərə (Madagiz) istiqamətində gedən döyüşlər zamanı məğlub edilən Ermənistan ordusunun 6-cı dağatıcı alayına köməyə gələn 193-cü əlahiddə həmlə taborunun döyüş bayrağı və sənədləri ələ keçirilib.