Putin və Makron Qarabağ münaqişəsinin deeskalasiyasına çağırıblar

Bakı/01.10.20/Turan: Kremlin mətbuat xidməti bildirib ki, sentyabrın 30-da Parisin təşəbbüsü ilə Vladimir Putinlə Fransa prezidenti Emmanuel Makronun telefon söhbəti olub.  

Prezidentlər Dağlıq Qarabağ münaqişəsi zonasında vəziyyətin kəskin şəkildə gərginləşməsini ətraflı müzakirə ediblər. Davam edən genişmiqyaslı hərbi əməliyyatlar ilə bağlı ciddi narahatlıq ifadə edilib.

Vladimir Putin və Emmanuel Makron münaqişə tərəflərini atəşin tezliklə və tamamən dayandırılmasına, gərginliyin deeskalasiyasına və maksimum təmkinlik  nümayiş etdirməyə çağırıblar.

Böhranın siyasi-diplomatik metodla nizamlanmasının alternativsiz olduğu vurğulanıb. Bu kontekstdə ilk növbədə, ATƏT-in Minsk Qrupu formatında gələcək qarşılıqlı fəaliyyətin konkret parametrləri nəzərdən keçirilib.

Minsk Qrupunun həmsədr dövlətlərinin liderləri (Rusiya, Fransa və ABŞ) adından silahlı qarşıdurmanın dərhal dayandırılmasının və danışıqlar prosesinin bərpasının lehinə bəyanat verməyə hazır olduqları ifadə edilib.

Həmçinin Belarusda prezident seçkilərindən sonra yaranmış vəziyyətə toxunulub. Suveren dövlətin daxili işlərinə hər hansı müdaxilə cəhdinin və legitim hakimiyyətlərə xarici təzyiqlərin yolverilməzliyi ilə bağlı Rusiya tərəfinin prinsipial mövqeyi təsdiqlənib.

Gələcək əlaqələr müəyyən edilib, RF prezidentinin saytı məlumat verib.

Fransa prezidentinin saytında bu söhbət haqda informasiya yoxdur.0-