Media-icmal 05.12.20

"Azərbaycan" qəzeti "Vətəndaş məsuliyyəti ilə koronavirusa qalib gələ bilərik" sərlövhəli məqalədə koronvirusa qarşı mübarizəni dəyərləndirir.

Müəllif deyir ki, artıq bu virusa yoluxanların sayı sürətlə 70 milyona yaxınlaşır, bir milyondan çox insan isə həyatını itirib.

Məqalədə deyilir ki, son vaxtlar Azərbaycanda koronavirusa yoluxma sayı artıb, gündəlik yoluxma sayı 4 min nəfəri ötüb, paralel olaraq ölüm sayı artıb.

Müəllifə görə, mövcud tendensiya onu deməyə əsas verir ki, qarşıdan gələn günlərdə yoluxma hallarının sayı xeyli arta bilər.

Digər tərəfdən, məqalədə deyilir ki,  digər ölkələrdə olduğu kimi, Azərbaycanda da insanlar vəziyyətin ciddiliyini dərk etmir, bir çox hallarda ehtiyatsız davranır, mövcud qaydaları pozur, tövsiyələrə laqeyd yanaşırlar.

Vətən müharibəsində şəhid olanların yas mərasimlərində kütləvi iştirak, torpaqların işğaldan azad olunması ilə bağlı yürüşlərin keçirilməsi COVID-19-un yayılması ilə bağlı vəziyyəti gərginləşdirib.

Həkimlər isə koronavirusun ən azı qarşıdakı ilin yaz aylarına qədər davam edəcəyi düşüncəsindədirlər, çünki kütləvi olaraq immunitet qazanılmadığı müddətdə bu virusun davam edəcəyi şübhəsizdir.

Müəllif hesab edir ki, əgər həmrəylik göstərilməsə, qoyulan qayda-qanunlara əməl edilməsə, o zaman virusun yayılma sürəti daha da arta bilər, belə ki, tendensiya yüksəlməyə doğru gedir.

Məqalədə deyilir ki, maskadan istifadə tələbi daha da ciddiləşdirildi, deməli, virusa yoluxma halları daha da arta bilər.

"Metbuat.az" saytı isə "Türkiyə sülhməramlıları Azərbaycanda mütləq olmalıdır" sərlövhəli məqalədə Türkiyə sülhməramlı qüvvələrinin Azərbaycana gəlməli oduğu məsələsini diqqət mərkəzinə çəkir.

Məqalədə hesab edilir ki, Türkiyə sülhməramlıları Azərbaycanda mütləq olmalıdır, bu, müzakirə mövzusu deyil, bunun alternativi yoxdur.

Yazıda Türkiyə dünyanın nüfuzlu güc mərkəzlərindən biri kimi dəyərləndirilir.

Türkiyənin Azərbaycanın ərazi bütövlüyünü birmənalı və davamlı dəstəkləməsi, Ermənistan qoşunlarının Azərbaycandan çıxarılmasını mütəmadi tələb etməsi xüsusi vurğulanır.

Müəllifin sözlərinə görə, Türkiyə sülhməramlı qüvvələrinin regionda olması Azərbaycan, Ermənistan və Rusiya arasında noyabrın 10-da imzalanmış üçtərəfli razılaşmada yer alır. 

Həm də məqalədə vurğulanır ki, Türkiyəsiz regionda sülh və sabitlik ola bilməz, türk əsgəri olduğu torpağa həmişə sülh gətirib və bu, Qarabağ məsələsində də belə olacaq.

"Modern.az" saytı isə "Milli Məclisdə büdcə müzakirələri başlayır, üç məsələyə diqqət ayrılacaq" sərlövhəli məqalədə yaxın vaxtlarda başlanacaq büdcə müzakirələrini ön plana çıxarır. 

Məqaləyə görə, büdcə müzakirələri noyabrın sonlarına planlaşdırılsa da, həm Vətən müharibəsi, həm də çox sayda deputatın virusa yoluxması səbəbindən saxlanılıb.

Yazıda deyilir ki, gələn ilin dövlət büdcəsində 3 məsələ prioritet olacaq.

"Birinci məsələ şəhid ailələri, qazilər və yaralıların sosial vəziyyəti, evlə təminatı, aylıq müavinətlərinə yenidən baxılmasıdır.

İkinci məsələ, işğaldan azad edilmiş ərazilərin minalardan təmizlənməsi və yaşayış üçün bərpa işlərinin aparılması və normal infrastrukturun qurulmasıdır.

Hazırda hamını narahat edən üçüncü məsələ dünyanı bürüyən koronavirus pandemiyası və ona qarşı mübarizədir.